Nanagna si Jeremias Batok sa Ehipto

587 sa wala pa si Cristo

Biblica® Open Ang Pulong sa Dios™ (OCCB)

Jeremias 43:8–13

8 Didto sa Tahpanhes, miingon ang Ginoo kang Jeremias, 9 “Samtang gatan-aw ang katawhan sa Juda, pagkuha ug dagkong bato ug ilubong kini sa minasang yutang kolonon, sa agianan pasulod sa puloy-anan sa hari sa Ehipto dinhi sa Tahpanhes. 10 Ingna sila nga ako, ang Ginoo nga Makagagahom, ang Dios sa Israel, nag-ingon, ‘Ipadala ko ang akong alagad nga si Nebucadnezar nga hari sa Babilonia, ug ibutang ko ang iyang trono niining mga bato nga akong gilubong ug ipahimutang niya ang iyang harianong tolda ibabaw niini. 11 Sulongon niya ang Ehipto ug mangamatay ang gitakda nga mamatay pinaagi sa katalagman. Bihagon ang gitakda nga bihagon, ug mangamatay pinaagi sa espada ang gitakda nga mamatay sa gira. 12 Daoban niya ang mga templo sa mga dios sa Ehipto; sunogon niya ang mga dios niini o dad-on ingon nga mga bihag. Kuhaan niya sa tanang bililhong kabtangan ang yuta sa Ehipto, sama sa pagkuha sa magbalantay sa karnero sa mga kuto gikan sa iyang bisti, ug mobiya siya gikan didto nga wala maunsa. 13 Dugmokon niya ang mga sagradong haligi sa Heliopolis, sa yuta sa Ehipto, ug sunogon niya ang mga templo sa mga dios sa Ehipto.’ ”

Jeremias 46:13–28

13 Mao kini ang giingon sa Ginoo kang Propeta Jeremias mahitungod sa pagsulong ni Nebucadnezar nga hari sa Babilonia ngadto sa Ehipto:

14 “Ipahibalo kini ngadto sa Ehipto,

sa mga lungsod sa Migdol, Memfis, ug Tahpanhes:

Pangandam kamo sa pagpanalipod sa inyong kaugalingon

kay ang espada andam na sa paglaglag kaninyo.

15 Nganong miatras man ang inyong mga maisog nga sundalo?

Miatras sila kay giabog sila sa Ginoo.

16 Magdinasmagay ang inyong mga sundalo,

ug mangatumba sila ug magdinat-ugay.

Moingon sila, ‘Bangon ug mamauli kita

sa atong mga katagilungsod,

ngadto sa yuta nga atong natawhan

aron makalikay kita sa espada sa atong kaaway.’

17 Ug didto moingon sila,

‘Ang Paraon nga hari sa Ehipto maayo lang sa istorya,

ug gipalabay lang niya ang iyang kahigayonan.’

18 “Ako, ang buhi nga Hari, ang Ginoo nga Makagagahom,

magsaad nga adunay mosulong sa Ehipto nga labaw kaniya,

sama sa Bukid sa Tabor sa taliwala sa kabukiran,

o sa Bukid sa Carmel daplin sa dagat.

19 Kamong mga lumulupyo sa Ehipto,

panghipos na kamo sa inyong dad-onon kay bihagon kamo.

Malaglag ang Memfis ug mahimo kining awaaw

ug wala nay magpuyo niini.

20 “Ang Ehipto sama kanindot sa dumalagang baka,

apan atakihon siya sa malalang insekto gikan sa amihan.

21 Bisan ang iyang sinuholan nga mga sundalo nga daw

mga nating torong baka nga maayong pagkaatiman

dili mobarog ug dili makig-away;

mangatras sila ug mangikyas. Mahitabo kini

tungod kay miabot na ang panahon

nga silotan sila ug laglagon.

22 Moikyas ang mga taga-Ehipto nga daw sa halas

nga nagtingog samtang nagkamang.

Mosulong ang iyang mga kaaway nga nagdala ug mga atsa,

nga daw mga tawong gapamutol ug kahoy.

23 Pamatyon nila ang mga taga-Ehipto nga daw

sa namutol sila ug labong nga mga kahoy.

Daghan pa sila kaysa sa mga dulon; dili sila maihap.

24 Maulawan gayod ang mga taga-Ehipto.

Itugyan sila ngadto sa kamot sa mga katawhan

nga gikan sa amihan.”

25 Nagpadayon sa pagsulti ang Ginoo nga Makagagahom, ang Dios sa Israel, “Silotan ko si Amon nga dios sa Tebes, ug ang ubang mga dios sa Ehipto. Silotan ko usab ang hari sa Ehipto ug ang iyang mga hari, apil ang mga nagsalig kaniya. 26 Itugyan ko sila sa kamot sa mga gustong mopatay kanila, ngadto kang Haring Nebucadnezar ug sa iyang mga opisyal. Apan pagkahuman, puy-an ra pag-usab ang Ehipto sama sa unang panahon. Ako, ang Ginoo, ang nag-ingon niini.

27 “Apan kamong mga Israelinhon nga kaliwat sa akong alagad nga si Jacob,

ayaw kamo kahadlok o kadismaya,

kay luwason ko kamo gikan sa layong dapit diin kamo gibihag.

Magkinabuhi kamo pag-usab nga malinawon ug layo

sa katalagman, ug wala na kamoy kahadlokan.

28 O mga kaliwat sa akong alagad nga si Jacob!

Ayaw gayod kamo kahadlok kay kauban ninyo ako.

Laglagon ko sa hingpit ang tanang kanasoran diin ko kamo gipatibulaag,

apan kamo dili ko laglagon sa hingpit.

Disiplinahon ko kamo basi sa hustisya.

Dili ako motugot nga dili kamo masilotan.

Ako, ang Ginoo, ang nag-ingon niini.”

Ang Kataposang mga Panagna ni Jeremias Batok sa mga Tigsimba sa mga Diosdios

Ang kataposang mga panagna ni Jeremias batok sa mga Judio nga nagsimba sa mga diosdios, ug batok sa Ehipto.

Jeremias 44

1 Adunay gisulti ang Ginoo kang Jeremias mahitungod sa tanang mga Judio sa Ehipto nga nagpuyo sa mga lungsod sa Migdol, sa Tahpanhes, sa Memfis, ug sa habagatang bahin sa Ehipto. 2 Mao kini ang gisulti sa Ginoo nga Makagagahom, ang Dios sa Israel: “Nakita ninyo ang grabe nga katalagman nga gipadala ko sa Jerusalem ug sa tanang lungsod sa Juda. Guba na kini ug wala nay namuyo 3 tungod sa kadaotang gihimo sa ilang mga lumulupyo. Gipalagot nila ako pinaagi sa pagsunog ug insenso ug pagsimba sa ubang mga dios nga wala gani nila o sa ilang mga katigulangan mailhi. 4 Kanunay akong nagpadala sa akong mga alagad nga propeta sa pagpahimangno kanila nga dili nila buhaton kining mangil-ad nga butang nga akong gikalagotan. 5 Apan wala gayod sila mamati o motuman sa mga propeta. Wala sila mobiya sa ilang pagkadaotan ni moundang sa pagsunog ug insenso ngadto sa ubang mga dios. 6 Busa gipatagamtam ko kanila ang akong labihan nga kasuko. Daw sa kalayo kini nga milamoy sa mga lungsod sa Juda apil na ang Jerusalem, ug nahimo kining awaaw hangtod karon.

7 “Busa ako, ang Ginoong Dios nga Makagagahom, ang Dios sa Israel mangutana, ‘Nganong sakiton man gayod ninyo ang inyong kaugalingon? Gusto ba kamo nga mahurot ang mga tawo sa Juda, ang mga kalalakin-an, kababayen-an, kabataan, ug ang mga masuso? 8 Nganong gipalagot man ninyo ako sa inyong gihimo nga mga dios? Gisunogan pa ninyo kinig insenso dinhi sa Ehipto, diin kamo nagpuyo karon. Kining inyong gibuhat, malaglag kamo. Ginalaglag lang ninyo ang inyong kaugalingon ug ginahimo nga kangil-aran ug kaulawan sa tanang nasod sa kalibotan. 9 Nalimot na ba kamo sa mga daotang binuhatan sa inyong mga katigulangan ug sa mga hari ug rayna sa Juda, ug ang inyo mismong kadaotan apil ang kadaotan sa inyong mga asawa didto sa Jerusalem ug sa ubang bahin sa Juda? 10 Hangtod karon wala pa gihapon kamo magpaubos sa inyong kaugalingon ug wala motahod kanako. Wala usab kamo motuman sa akong balaod ug sa mga kasugoan nga akong gihatag kaninyo ug sa inyong mga katigulangan.’

11 “Busa ako, ang Ginoo nga Makagagahom, nga Dios sa Israel, andam na sa paglaglag sa tibuok Juda ug kaninyo. 12 Kamong nahibiling buhi sa Juda nga gusto gayong moari ug mopuyo sa Ehipto, mamatay kamong tanan, gikan sa labing ubos hangtod sa labing dungganon. Oo, mangamatay kamo sa gira ug kagutom dinhi sa Ehipto. Panghimaraoton kamo ug malisang ang mga tawo tungod kaninyo. Biay-biayon nila kamo ug tunglohon. 13 Himuon ko diha kaninyo sa Ehipto ang sama sa akong gihimo ngadto sa Jerusalem. Silotan ko usab kamo pinaagi sa gira, kagutom, ug balatian. 14 Mamatay gayod kamong tanang nahibiling mga taga-Juda nga namuyo sa Ehipto. Dili na kamo makabalik pa sa Juda, diin gusto kamong mobalik pagpuyo. Walay makabalik kaninyo nga luwas, gawas sa pipila nga makaikyas.”

15 Daghan kaayong mga Judio ang nagtigom sa pagpatalinghog kang Jeremias. Kini sila mga lumulupyo sa amihan ug habagatang bahin sa Ehipto. Unya, ang tanang mga lalaki nga nasayod nga ang ilang mga asawa nagsunog ug insenso sa ubang mga dios, ug ang tanang mga babaye nga atua didto, miingon kang Jeremias, 16 “Dili kami motuo sa gisulti mo sa ngalan sa Ginoo! 17 Buhaton gayod namo ang tanang gusto namong buhaton: magsunog kami ug insenso sa Rayna sa Langit ug maghalad kaniya ug halad nga ilimnon sama sa gihimo namo sa mga lungsod sa Juda ug sa kadalanan sa Jerusalem. Mao usab kini ang gihimo sa among mga katigulangan ug sa among mga hari ug mga opisyal. Niadtong mga panahona maayo ang among kahimtang; daghan kamig pagkaon ug walay daotang nahitabo kanamo. 18 Apan sa dihang miundang kami sa pagsunog ug insenso ngadto sa Rayna sa Langit ug wala na maghalad ug halad nga ilimnon kaniya, nawad-an na hinuon kami sa tanan. Ug daghan kanamo ang nangamatay sa gira ug kagutom.

19 “Sa matag higayon nga magsunog kamig insenso ngadto sa Rayna sa Langit, maghalad ug halad nga ilimnon kaniya, ug magluto ug pan nga giporma sa iyang dagway, nasayod niini ang among mga bana.”

20 Unya miingon si Jeremias kanilang tanan nga mga kalalakin-an ug mga kababayen-an nga mihatag kaniya sa maong tubag, 21 “Naghuna-huna ba kamo nga wala masayod ang Ginoo nga kamo ug ang inyong mga katigulangan, ang inyong mga hari ug mga opisyal, ug ang tanan nga lumulupyo nagsunog ug insenso sa mga lungsod sa Juda ug sa mga kadalanan sa Jerusalem? 22 Sa dihang wala na makaagwanta ang Ginoo sa inyong kadaotan ug sa inyong mangil-ad nga mga buhat, gilaglag niya ang inyong yuta, gigamit ang ngalan niini sa pagpanghimaraot, ug nahimo kining awaaw ug wala nay nagpuyo, sama sa nahitabo karon. 23 Nahitabo kini nga katalagman kaninyo tungod kay nagsunog kamog insenso ug nagpakasala sa Ginoo. Wala kamo motuman sa iyang balaod ni mosunod sa iyang mga sugo ug mga pahimangno.”

24 Midugang pa si Jeremias sa pag-ingon sa tanang mga tawo, apil ang mga kababayen-an didto, “Paminawa ninyo ang pulong sa Ginoo, kamong katawhan sa Juda nga nagpuyo sa Ehipto. 25 Mao kini ang gisulti sa Ginoo nga Makagagahom, ang Dios sa Israel: Gituman gayod ninyo ug sa inyong mga asawa ang inyong gisaad nga magsunog ug insenso ug maghalad ug halad nga ilimnon ngadto sa Rayna sa Langit.

“Sige! Padayona ninyo ang inyong gihimo. Tumana gayod ninyo ang inyong gipanaad. 26 Apan patalinghogi ninyo ang akong isulti, kamong katawhan sa Juda nga namuyo sa Ehipto: ‘Gisaad ko sa akong kaugalingon nga wala na kaninyoy makagamit sa akong gamhanang ngalan. Dili ako motugot nga gamiton ninyo ang akong ngalan sa pagpanumpa ug sama niini, “Ipanumpa ko sa ngalan sa buhi nga Ginoong Dios.” 27 Kay imbis nga bantayan ko kamo alang sa inyong kaayohan, silotan ko kamo. Mangamatay kamo sa Ehipto pinaagi sa gira o kagutom hangtod nga wala nay mahibilin kaninyo. 28 Kon aduna man mahibilin sa gira ug makabalik sa Juda, gamay lang kaayo. Unya masayod ang nahibiling mga katawhan sa Juda nga namuyo sa Ehipto kon kang kinsang pulong ang matuman, ako ba o ila.

29 “ ‘Mao kini ang ilhanan nga silotan ko gayod kamo niining dapita, aron masayod kamo nga matuman gayod ang katalagman nga gisulti ko batok kaninyo: 30 Itugyan ko si Paraon Hofra nga hari sa Ehipto sa kamot sa iyang mga kaaway nga gustong mopatay kaniya, maingon nga gitugyan ko si Zedekia nga hari sa Juda ngadto sa iyang kaaway nga si Nebucadnezar nga hari sa Babilonia nga gusto usab nga mopatay kaniya.’ ”

Gisaysay Pag-usab ang mga Pagkabihag sa mga Judio sa Kamot ni Nebucadnezar

Usa ka mubo nga katingbanan sa mga pagkabihag sa mga Judio sa kamot ni Nebucadnezar.

Jeremias 52:28–30

28 Mao kini ang gidaghanon sa mga Israelinhon nga gibihag ni Haring Nebucadnezar: Sa ikapito nga tuig sa iyang paghari, 3,023 ka mga tawo. 29 Sa ika-18 nga tuig sa iyang paghari, 832 ka mga tawo. 30 Sa ika-23 nga tuig sa iyang paghari, 745 ka mga tawo. Si Nebuzaradan nga komander sa mga tigbalantay sa hari ang nagbihag kanila. 4,600 tanan ka mga tawo ang nabihag.