Gitagna ni Isaias ang Pagsulong sa mga Asirianhon (continued)
Ang tagna ni Isaias bahin sa pagsulong sa kasundalohan sa Asiria sa Palestina.
715 sa wala pa si Cristo
Biblica® Open Ang Pulong sa Dios™ (OCCB)
1 Ang mga kaliwat ni David nahisama sa kahoy nga gipukan.
Apan maingon nga manalingsing ang tuod sa kahoy nga gipukan,
moabot usab ang usa ka bag-ong hari gikan sa kaliwat ni David.
2 Ang Espiritu sa Ginoo magagahom kaniya nga
maghatag kaniyag kaalam, pagsabot, abilidad sa pagplano,
gahom, kahibalo, ug pagtahod sa Ginoo.
3 Ug kalipay niya ang pagtahod sa Ginoo.
Dili siya mohukom pinasikad lang sa iyang makita o madungog.
4 Hatagan niya ug makatarunganong paghukom ang mga kabos
ug hatagan niyag kaangayan ang mga biktima sa pagpahimulos.
Sa iyang pagdumala, silotan niya ang kalibotan
ug mangamatay ang mga tawong daotan.
5 Anaa kanunay kaniya ang pagkamatarong ug pagkamasaligan
sama sa bakos nga mohugot sa hawak sa tawo.
6 Nianang adlawa, magpuyo ang bangis nga iro uban sa nating karnero.
Mohigda ang leopardo uban sa nating kanding.
Mag-uban ug kaon ang nati sa baka ug ang anak sa liyon,
ug usa ka gamayng bata ang moatiman kanila.
7 Mag-uban ug kaon ang baka ug ang oso,
ug ang ilang mga anak mag-uban sa pagpanghigda.
Ang liyon mokaon ug dagami sama sa baka.
8 Bisan pag magdula ang batang masuso
duol sa bangag nga gipuy-an sa bitin nga malala,
ug isulod sa gamayng bata ang iyang kamot sa bangag sa bitin,
dili sila maunsa.
9 Wala nay magpasakit o mangdaot sa Zion, sa akong balaan nga bukid.
Kay ang mga tawo sa kalibotan mapuno sa kahibalo mahitungod sa Ginoo,
maingon nga ang dagat napuno sa tubig.
10 Nianang adlawa ang bag-ong hari nga kaliwat ni David mahisama sa usa ka bandera nga ilhanan ngadto sa mga nasod. Magtigom ang mga nasod ngadto kaniya ug mabantog ang iyang gipuy-an. 11 Nianang adlawa, gamiton pag-usab sa Ginoo ang iyang gahom sa pagpabalik sa mga nahibilin niyang mga katawhan nga atua gikan sa Asiria, Ehipto, Patros, Etiopia, Elam, Babilonia, Hamat, ug sa mga isla.
12 Ibayaw sa Ginoo ang usa ka bandera sa pagpakita sa mga nasod
nga ginatigom na niya ang katawhan sa Israel
ug Juda gikan sa nagkalain-laing bahin sa kalibotan.
13 Mawala na ang kasina sa Israel ngadto sa Juda
ug ang kapungot sa Juda ngadto sa Israel.
14 Maghiusa sila sa pagsulong sa mga Filistihanon sa kasadpan.
Sulongon usab nila ang mga nasod sa sidlakan
ug kuhaon ang mga kabtangan niini.
Sakopon nila ang Edom ug Moab,
ug ang mga Amonihanon mailalom sa ilang gahom.
15 Pahubsan sa Ginoo ang Dagat sa Ehipto,
ug padad-an niyag init nga hangin ang Suba sa Eufrates
aron mabahin ngadto sa pito ka sapa-sapa
nga mahimo nang tabokon sa tawo pinaagi sa pagbaklay.
16 Maingon nga adunay lapad nga dalan nga giagian ang katawhan
sa Israel sa dihang mibiya sila gikan sa Ehipto,
aduna usab lapad unya nga dalan alang
sa mga nabilin niyang mga katawhan didto sa Asiria.
12:1 Niana unyang adlawa mag-awit kamo:
“Ginoo, dayegon ka nako.
Nasuko nako kanako,
apan karon nahupay na ang imong kasuko,
ug ginalipay mo ako.
2 Ikaw, O Dios, mao ang akong manluluwas.
Mosalig ako kanimo ug dili mahadlok.
Ikaw, Ginoo, mao ang naghatag kanakog kusog,
ug ikaw ang akong ginaawit.
Ikaw ang nagluwas kanako.”
3 Maingon nga ang bugnawng tubig naghatag ug kalipay sa giuhaw,
malipay kamo kon luwason kamo sa Ginoo.
4 Pag-abot nianang adlawa, mag-awit kamo:
“Dayega ninyo ang Ginoo! Simbaha ninyo siya!
Isugilon ngadto sa mga katawhan ang iyang mga binuhatan.
Isugilon ninyo nga dalaygon siya.
5 Awiti ninyo ang Ginoo tungod kay
katingalahan ang iyang gipanghimo.
Ipahibalo ninyo kini sa tibuok kalibotan.
6 Panghugyaw kamo ug pag-awit sa kalipay,
kamo nga katawhan sa Jerusalem.
Kay gamhanan ang Balaang Dios
sa Israel nga anaa uban kaninyo.”
13:1 Mao kini ang mensahe bahin sa Babilonia nga gipadayag sa Ginoo kang Isaias nga anak ni Amos:
2 Ibayaw ang usa ka bandera didto sa kinatumyan
sa hawan nga bungtod.
Unya singgit kamo ug kusog ngadto sa mga sundalo ug sinyasi sila
nga sulongon ang mga pultahan sa siyudad sa mga dungganong tawo.
3 Gisugo ko na ang akong piniling mga sundalo
sa pagsilot sa mga tawong akong gikapungtan.
Kini nga mga sundalo nangalipay kay nagtuo gayod sila
nga himuon ko kini nga pagsilot.
4 Pamatia ninyo ang kasaba gikan sa mga bukid
sa labihan kadaghang mga tawo.
Pamatia ninyo ang kasaba taliwala sa mga gingharian
ug mga nasod nga nagtigom.
Gitigom sa Ginoo nga Makagagahom
ang iyang mga sundalo alang sa pagpakig-gira.
5 Naggikan sila sa layo kaayong mga dapit.
Laglagon sa Ginoo ang tibuok yuta
pinaagi sa iyang mga sundalo.
6 Panghilak kamo tungod kay haduol na ang adlaw sa Ginoo,
ang adlaw nga manglaglag ang Makagagahom nga Dios.
7 Nianang panahona, mangaluya ang tanang kamot sa mga tawo.
Malisang ang tanang mga tawo.
8 Magkurog sila sa kahadlok.
Bation nila ang labihang kasakit
ug maghigwaos sila sama sa babaye nga nagbati.
Magtinan-away sila sa usag usa,
ug ang ilang mga nawong mamula sa labihang kaulaw.
9 Pamati! Moabot ang adlaw sa Ginoo,
ang adlaw sa kapintas ug labihan nga kasuko.
Laglagon ang yuta hangtod nga dili na mapuy-an,
ug laglagon usab ang mga makasasala diha niini.
10 Dili na mohatag sa ilang kahayag ang mga bitoon.
Mosubang ang adlaw nga walay kahayag
ug ang bulan dili usab mohatag ug kahayag.
11 Miingon ang Ginoo, “Silotan ko ang kalibotan tungod sa iyang kadaotan,
ug ang mga tawong daotan tungod sa ilang mga sala.
Santaon ko ang mga garboso, ug sumpoon ko
ang pagkamapahitas-on sa mga tawong walay kaluoy.
12 Gamay na lang unya ang mahibiling mga tawo.
Mas nihit pa unya sila kay sa purong bulawan nga gikan sa Ofir.
13 Uyogon ko ang langit ug matay-og ang kalibotan.
Ako ang Ginoo nga Makagagahom, himuon ko kini sa adlaw nga ipakita ko ang akong labihan nga kapungot.”
14 Ang mga dumuduong sa Babilonia moikyas balik sa ilang tagsa-tagsa ka dapit
sama sa hayop nga usa nga gipangayam.
Manguli sila sama sa karnero nga walay magbalantay.
15 Ang madakpan patyon pinaagi sa espada.
16 Dugmokon ang ilang gagmayng mga bata diha gayod mismo sa ilang atubangan.
Kuhaon ang mga kabtangan gikan sa ilang mga balay
ug lugoson ang ilang mga asawa.
17 Pamati! Pasulongon ko sa Babilonia ang mga taga-Media
nga dili madani sa pilak ug bulawan.
18 Pamatyon nila pinaagi sa pana ang mga batan-ong lalaki.
Dili nila kaloy-an ang mga kabataan bisan ang mga masuso.
19 Laglagon ko sama sa Sodoma ug Gomora ang Babilonia,
ang labing matahom nga gingharian sa tanan,
ang garbo ug dungog sa mga lumulupyo niini.
20 Dili na gayod kini puy-an bisan kanus-a.
Walay Arabo nga magpatindog didto sa iyang tolda.
Ug wala usay magbalantay sa karnero nga magpasabsab
sa iyang mga karnero didto.
21 Puy-an na lang kini sa ihalas nga mga mananap.
Ang ilang mga balay puy-an sa mga kuwago ug sa uban pang mga mananap.
Molukso-lukso didto ang mga ihalas nga mga kanding.
22 Ang mga mananap nga murag iro mag-uwang
sa mga tore ug sa mga palasyo sa Babilonia.
Hapit na ang kataposan sa Babilonia;
dili na kini madugay.