Gibadlong ang Pagsimba sa mga Idolo
710 sa wala pa si Cristo
Biblica® Open Ang Pulong sa Dios™ (OCCB)
1 “Pamati kamong mga kaliwat ni Jacob,
kamong gitawag ug Israel,
ug naggikan sa tribo ni Juda.
Nanumpa kamo sa ngalan sa Ginoo,
ug nagtawag kamo sa Dios sa Israel.
Apan dili kini kinasing-kasing,
kay dili matarong ang inyong kinabuhi.
2 Gitawag pa ninyo ang inyong kaugalingon
nga mga lumulupyo sa balaang siyudad
ug nag-ingon nga nagsalig kamo sa Dios sa Israel,
nga ang ngalan Ginoo nga Makagagahom.”
3 Nag-ingon siya kaninyo, “Giingon ko na kaniadto
kon unsa ang mahitabo sa umaabot.
Ug sa kalit lang gituman ko kini.
4 Nahibalo ako kon unsa kamo kagahig ulo.
Ang inyong liog sama kagahi sa puthaw,
ug ang inyong agtang sama kagahi sa bronsi.
5 Busa gisulti ko nang daan kaninyo ang akong buhaton.
Sa wala pa kini mahitabo gipahibalo ko na kini kaninyo,
aron dili kamo makaingon nga ang inyong mga dios-dios
nga hinimo gikan sa kahoy ug metal
mao ang nagbuhat ug nagtuman niini.
6 Nadungog ninyo ang akong gipangbuhat
ug nakita ninyo ang katumanan niini,
apan dili kamo modawat nga ako ang nagbuhat niini.
Sukad karon sultihan ko kamo sa bag-ong mga butang
nga wala ko pa ipadayag kaninyo, ug wala pa ninyo masayri.
7 Karon ko pa lang kini himoa,
ug wala pa ninyo kini madunggi kaniadto,
aron dili kamo makaingon nga, ‘Ah! Nasayod na kami niana!’
8 Wala kamo makadungog o makasabot niining mga butanga
kay sukad pa kaniadto nagpabungol-bungol na kamo.
Nasayod ako kon unsa kamo kamaluibon.
Kay sukad pa sa inyong pagkatawo, mga masupilon na kamo.
9 Alang sa akong kadungganan, pugngan ko ang akong
kasuko kaninyo, aron dili kamo malaglag.
10 Pamati! Gihinloan ko kamo
apan dili sama sa pagputli sa plata.
Gihinloan ko kamo pinaagi sa pagpaantos.
11 Himuon ko kini alang sa akong kadungganan.
Dili gayod ako motugot nga maulawan ako
ug ang mga dios-dios ang mapasidunggan.
12 “Pamati kamo kanako, kamong taga-Israel nga akong pinili.
Ako ang Dios; ako ang sinugdanan
ug ang kataposan sa tanan.
13 Ako mismo ang nagbutang sa pundasyon sa kalibotan
ug nagbukhad sa kalangitan.
Kon magmando ako kanila, motuman sila.
14 “Duol kamong tanan ug pamati.
Kinsang dios-dios ang nagtagna nga sulongon sa akong higala
ang Babilonia aron sa pagtuman sa akong plano
batok niini nga nasod? Wala gayod!
15 Ako mismo ang nagsulti ug nagtawag kaniya.
Sugoon ko siya ug magmadaogon siya sa iyang himuon.
16 Duol kamo kanako ug pamatia kini:
Sukad sa sinugdanan
wala ako magsulti diha sa tago,
ug sa panahon
nga nahitabo ang akong mga gisulti, anaa ako.”
Ug karon ang Ginoong Dios
ug ang iyang Espiritu nagpadala
kanako aron sa pagsulti niini nga mensahe.
17 Miingon ang Ginoo nga inyong Manluluwas,
ang Balaang Dios sa Israel:
“Ako ang Ginoo nga inyong Dios
nga nagtudlo kaninyo kon unsa ang maayo alang kaninyo
ug nagtultol kaninyo sa hustong dalan.
18 Kon nagtuman lang unta kamo sa akong mga sugo,
sama unta sa suba nga modagayday ang mga kaayohan diha kaninyo,
ug magsunod-sunod lang unta ang inyong mga kadaogan
sama sa mga balod nga naglapya sa baybayon.
19 Ang inyong mga kaliwat mahisama unta kadaghan sa balas nga dili maihap,
ug dili gayod unta sila malaglag o mahanaw sa akong atubangan.”
20 Biya kamo sa Babilonia!
Imantala ninyo nga malipayon sa tibuok kalibotan
nga giluwas sa Ginoo ang iyang alagad,
ang katawhan sa Israel.
21 Wala sila uhawa sa dihang gipangulohan sila sa Dios didto sa mga kamingawan,
kay gipatubod niya ang tubig alang kanila gikan sa bato.
Gisiak niya ang bato ug mibuhagay ang tubig.
22 “Apan ang mga daotan dili makaangkon ug kalinaw,”
sumala sa Ginoo.
Ang Mesiyas Nakigsulti sa Iyang Katawhan
1 Pamati kamo kanako, kamong anaa sa mga isla.
Sa wala pa ako matawo gitawag na ako sa Ginoo nga moalagad kaniya.
2 Gihimo niya ang akong mga pulong nga sama kahait sa espada.
Gipanalipdan niya ako sa iyang gahom.
Gihimo niya ako nga sama sa sinaw nga pana
nga andam nang gamiton.
3 Miingon siya kanako, “Israel, ikaw ang akong alagad.
Pinaagi kanimo, pasidunggan ako sa mga tawo.”
4 Apan miingon ako, “Ang akong paghago nakawang;
giusikan ko ang akong kusog sa mga butang nga walay hinungdan.”
Apan gitugyan ko lang kini sa Ginoo nga akong Dios;
siya na ang mahibalong moganti kanako.
5 Ang Ginoo naghimo kanako diha sa sabakan
sa akong inahan nga mahimong iyang alagad aron magtigom
ug dad-on pagbalik ang mga Israelinhon ngadto kaniya.
Gipasidunggan ako sa Ginoo ug siya nga akong Dios
mao ang naghatag kanakog kusog.
6 Miingon siya, “Ikaw nga akong alagad,
aduna pa akoy dakong buluhaton nga ipabuhat kanimo,
gawas sa pagpabalik sa mga Israelinhon nga akong gipanalipdan.
Himuon ka nako nga sama sa suga ngadto sa mga kanasoran
aron maluwas ang tibuok kalibotan.”
7 Miingon ang Ginoo, ang Manluluwas ug Balaang Dios sa Israel,
ngadto sa tawo nga gikalagotan
ug gitamay sa mga nasod, ug alagad sa mga pangulo,
“Makita sa mga hari kon kinsa gayod ikaw
ug manindog sila sa pagtahod kanimo.
Ang mga pangulo moyukbo sa pagpasidungog kanimo.
Mahitabo kini tungod kanako, ang Ginoo nga matinumanon,
ang Balaan nga Dios sa Israel. Ako ang nagpili kanimo.”
8 Mao kini ang giingon sa Ginoo,
“Sa hustong panahon nga luwason ka nako,
tubagon ug tabangan ka nako.
Panalipdan ka nako ug pinaagi kanimo maghimo
akog kasabotan tali sa mga tawo.
Tukoron mo pag-usab ang yuta sa Israel nga naguba,
ug ihatag mo kini pagbalik sa akong katawhan.
9 Moingon ka sa mga Israelinhon nga binihag
ug binilanggo diha sa mangitngit nga dapit,
‘Gawas kamo! Adunay kagawasan na kamo!’
“Mahisama sila sa mga karnero nga manibsib
sa daplin sa mga agianan o sa taas nga mga dapit.
10 Dili sila gutomon o uhawon.
Dili sila maunsa sa kainit sa adlaw o sa mainit nga hangin sa disyerto.
Kay ako nga adunay kaluoy kanila motultol kanila ngadto sa tuboran.
11 Himuon kong dalan ang akong mga bukid nga ilang agianan.
12 Moabot ang akong katawhan gikan sa layo,
ang uban gikan sa amihan, ang uban sa kasadpan,
ug ang uban gikan sa yuta sa Sinim.”
13 Pag-awit sa kalipay, O kalangitan!
Paglipay, O kalibotan!
Pag-awit kamong mga bukid!
Kay lipayon
ug kaloy-an sa Ginoo ang iyang katawhan nga nag-antos.
14 Apan miingon ang katawhan sa Jerusalem,
“Gisalikway na kami sa Ginoo. Gikalimtan na niya kami.”
15 Apan mitubag ang Ginoo,
“Makalimot ba ang usa ka inahan sa iyang anak nga masuso?
Dili ba niya kaloy-an ang bata nga iyang gipanganak?
Bisan malimot siya, ako dili gayod malimot kaninyo!
16 O Jerusalem, dili ko gayod ikaw kalimtan.
Gisulat ko ang imong ngalan sa akong mga palad.
Gihuna-huna ko kanunay nga pabarogon ko pag-usab ang imong mga paril.
17 Hapit na moabot ang mopabarog kanimo pag-usab,
ug ang mga naglaglag kanimo mobiya na kanimo.
18 Tan-awa ang imong palibot; ang imong katawhan
nagtigom na ug nagduol kanimo.
Ako, ang buhi nga Ginoo, manumpa nga ipasigarbo mo sila
sama sa pagpasigarbo sa babayeng kaslonon
sa mga alahas nga iyang gisul-ob.
19 “Nalaglag ka ug nahimong awaaw. Apan karon, ang imong yuta
halos dili na paigo nga puy-an sa imong katawhan.
Ug kadtong mga naglaglag kanimo mahilayo na.
20 Ang imong katawhan nga natawo sa panahon sa imong pagsubo moingon kanimo,
‘Gamay ra kaayo kining dapita alang kanamo.
Hatagi kamig mas dako pang dapit nga kapuy-an.’
21 Unya moingon ka sa imong kaugalingon,
‘Kinsa bay nanganak niini kanila alang kanako?
Nangamatay ang daghan kong katawhan,
ug tungod niini nasubo ako.
Ang uban kanila gibihag ngadto sa ubang dapit,
ug nahibilin akong nag-inusara.
Busa diin kini sila gikan? Kinsa ang nagsagop kanila?’ ”
22 Mao kini ang giingon sa Ginoong Dios,
“Pamati! Sinyasan ko ang mga nasod,
ug ibalik nila kanimo ang imong katawhan nga daw sa mga bata nga ginakugos.
23 Mag-alagad kanimo ang mga hari ug mga rayna.
Sila ang moatiman kanimo.
Moluhod sila agig pagtahod kanimo,
ug magpasakop gayod sila kanimo.
Unya mahibaloan mo nga ako mao ang Ginoo,
ug ang mga nagsalig kanako dili gayod mapakyas.”
24 Makuha ba pagbalik ang gipang-ilog sa mapintas nga mga sundalo?
Maluwas pa ba ang ilang gipangbihag?
25 Apan mao kini ang giingon sa Ginoo,
“Oo, maluwas mo ang gipangbihag
sa mapintas nga mga sundalo
ug makuha mo pagbalik ang ilang gipang-ilog.
Kay makig-away ako sa mga nakig-away kanimo
ug luwason ko ang imong katawhan.
26 Ipakaon ko sa mga nagdaog-daog kanimo ang ilang kaugalingong lawas.
Ug sama sa bino, mahubog sila sa ilang kaugalingong dugo.
Unya masayod ang tanang mga tawo nga ako mao ang Ginoo,
ang imong Manluluwas ug Manunubos,
ang Makagagahom nga Dios ni Jacob.”