Gipadala ang mga Bitin nga Makapaso ang Paak
1452 sa wala pa si Cristo
Biblica® Open Ang Pulong sa Dios™ (OCCB)
4 Gikan sa Bukid sa Hor, milakaw ang mga Israelinhon agi sa dalan paingon sa Pulang Dagat, libot sa yuta sa Edom. Apan gipul-an ang mga tawo sa ilang lakaw, 5 busa mireklamo sila sa Dios ug kang Moises. Miingon sila, “Nganong gipagawas mo pa kami gikan sa Ehipto aron mangamatay lang dinhi sa kamingawan? Walay pagkaon ug tubig dinhi! Ug giluod na kami niining walay lami nga manna.”
6 Busa, gipadad-an sila sa Ginoo ug mga bitin nga malala ug gipamaak sila, ug daghan ang nangamatay kanila. 7 Ug nangadto ang mga tawo kang Moises ug miingon, “Nakasala kami kay nagsulti kami batok sa Ginoo ug kanimo. I-ampo sa Ginoo nga ipahilayo niya kining mga bitin gikan kanamo.” Busa nag-ampo si Moises alang sa mga tawo.
8 Miingon ang Ginoo kang Moises, “Paghimo ug bronsi nga bitin ug ibutang kini sa tumoy sa usa ka poste. Si bisan kinsa nga mapaakan ug bitin dili mamatay kon motan-aw lang niining bronsi nga bitin.” 9 Busa naghimo si Moises ug bronsi nga bitin ug gibutang kini sa tumoy sa usa ka poste. Ug si bisan kinsa nga napaakan ug bitin motan-aw lang niining bronsi nga bitin ug dili kini mamatay.
Ang Ikakatloan ug Lima nga Panaw: Gikan sa Zalmuna ngadto sa Punon
42 Gikan sa Zalmuna, nagkampo sila sa Punon.
Ang Ikakatloan ug Unom nga Panaw: Gikan sa Punon ngadto sa Obot
43 Gikan sa Punon, nagkampo sila sa Obot.
10 Mipadayon sa paglakaw ang mga Israelinhon, ug nagkampo sila sa Obot.
Ang Ikakatloan ug Pito nga Panaw: Gikan sa Obot ngadto sa Iye Abarim
44 Gikan sa Obot, nagkampo sila sa Iye Abarim nga anaa sa utlanan sa Moab.
11 Gikan sa Obot, milakaw sila ug nagkampo sa Iye Abarim, sa kamingawan sa sidlakan atbang sa Moab.
Ang Ikakatloan ug Walo nga Panaw: Gikan sa Iye Abarim ngadto sa Dibon Gad 1451 sa wala pa si Cristo
Ang ikakatloan ug walo nga panaw: gikan sa Iye Abarim, o Iye Abarim, ngadto sa Dibon Gad.
45 Gikan sa Iye Abarim, nagkampo sila sa Dibon Gad.
12 Gikan didto milakaw sila ug nagkampo sa Walog sa Zered. 13 Gikan sa Zered milakaw na usab sila ug nagkampo sa tabok sa Walog sa Arnon, nga anaa sa kamingawan nga duol sa teritoryo sa mga Amorihanon. Ang Arnon maoy utlanan nga anaa sa yuta sa mga Moabihanon ug sa yuta sa mga Amorihanon. 14 Mao kana ang hinungdan kon nganong nasulat sa Libro sa Pagpakig-away sa Ginoo:
“ang lungsod sa Waheb nga sakop sa Sufa,
ang mga walog apil na ang Arnon, 15 ug ang ubos
nga bahin sa mga walog nga nagsumpay sa lungsod sa Ar
nga anaa sa utlanan sa Moab.”
16 Gikan didto sa Arnon, ang mga Israelinhon nangadto sa Beer, ang atabay diin miingon ang Ginoo kang Moises, “Tigoma ang mga tawo kay hatagan ko sila ug tubig.”
17 Ug didto nanganta ang mga Israelinhon niini nga awit:
“Padayon pagtubod, O atabay!
Mag-awit kita mahitungod niini
18 nga atabay nga gipakalot sa mga pangulo
ug mga dungganong mga tawo
pinaagi sa ilang awtoridad.”
Gikan sa kamingawan nangadto sila sa Matana;
Ang Kapildihan ni Sihon, Hari sa mga Amorihanon
21 Unya, nagpadala ang Israel ug mga mensahero ngadto kang Sihon nga hari sa mga Amorihanon. Mao kini ang ilang mensahe:
22 “Kon mahimo, tugoti kami sa pag-agi sa inyong yuta. Dili kami molatas sa kaumahan o sa ubasan, ni moinom gikan sa inyong atabay. Mosubay lang kami sa dakong dalan hangtod nga makagawas kami sa inyong teritoryo.”
23 Apan wala mosugot si Sihon nga moagi ang mga Israelinhon sa iyang teritoryo. Gitigom hinuon niya ang iyang tibuok kasundalohan ug nangadto sila sa kamingawan ug giataki ang mga Israelinhon. Pag-abot nila sa Jahaz, nakig-gira sila sa mga Israelinhon. 24 Apan gipamatay sila sa mga Israelinhon ug giilog ang ilang yuta gikan sa Arnon paingon sa Suba sa Jabok. Apan kutob lang ang mga Israelinhon sa utlanan sa yuta sa mga Amonihanon, tungod kay lig-on ang mga paril sa ilang utlanan. 25 Busa nailog sa mga Israelinhon ang tanang mga lungsod sa mga Amorihanon ug gipuy-an nila kini, lakip ang Hesbon ug ang tanang mga baryo nga sakop niini. 26 Kining Hesbon kaniadto maoy nag-unang lungsod ni Sihon, ang hari sa mga Amorihanon. Gipildi niya kaniadto ang usa ka hari sa Moab ug giilog niya ang tanang kayutaan niini kutob sa Arnon.
27 Mao kana nga ang mga magbabalak nag-ingon:
“Dali kamo sa Hesbon, ang lungsod ni Sihon!
Tukora ninyo kini pag-usab.
28 “Kaniadto ang mga sundalo sa Hesbon misulong
nga daw nagdilaab nga kalayo nga milamoy sa lungsod
sa Ar nga sakop sa Moab
ug milaglag sa mga habog nga dapit sa Arnon.
29 Makaluluoy kamong mga taga-Moab!
Alaot kamong mga nagsimba sa dios-dios nga si Kemosh!
Kamong iyang mga anak gipasagdan niya nga mabihag
ni Sihon nga hari sa mga Amorihanon.
30 “Apan karon nalaglag na ang mga Amorihanon.
Napukan na ang lungsod sa Hesbon,
lakip ang Dibon, Nopa, ug Medeba.”
31 Busa mipuyo ang mga Israelinhon sa yuta sa mga Amorihanon.
32 Unya nagpadala si Moises ug mga espiya sa Jazer, ug giilog usab nila kini ug ang mga baryo nga sakop niini. Gipapahawa nila ang mga Amorihanon nga namuyo didto.
Ang Kapildihan ni Og, Hari sa Basan
33 Pagkahuman, nangadto na usab sila sa Basan. Apan gisulong sila ni Og nga hari sa Basan ug sa iyang tibuok kasundalohan didto sa Edrei.
34 Miingon ang Ginoo kang Moises, “Ayaw kahadlok kaniya, kay itugyan ko siya kanimo, lakip ang tibuok niyang katawhan ug kayutaan. Buhata kaniya ang gibuhat mo kang Sihon nga hari sa mga Amorihanon, nga naghari sa Hesbon.”
35 Busa gipatay sa mga Israelinhon si Og, lakip ang iyang mga anak ug ang tanan niyang katawhan, ug wala gayoy nahibilin kanila. Pagkahuman, gipanag-iya dayon sa mga Israelinhon ang yuta nga sakop ni Og.
Ang Ikakatloan ug Siyam nga Panaw: Gikan sa Dibon Gad ngadto sa Almon Diblataim
46 Gikan sa Dibon Gad, nagkampo sila sa Almon Diblataim.
Ang Ikakap-atan nga Panaw: Ngadto sa Kabukiran sa Abarim
Ang ikakap-atan nga panaw: gikan sa Almon Diblataim ngadto sa kabukiran sa Abarim.
47 Gikan sa Almon Diblataim, nagkampo sila sa kabukiran sa Abarim duol sa Nebo.
19 gikan sa Matana nangadto sila sa Nahaliel; gikan sa Nahaliel nangadto sila sa Bamot; 20 ug gikan sa Bamot nangadto sila sa walog sa Moab, diin malantaw gikan sa kinatumyan sa Bukid sa Pisga ang kamingawan.
Ang Ikakap-atan ug Usa nga Panaw: Gikan sa Abarim ngadto sa Kapatagan sa Moab
Ang ikakap-atan ug usa nga panaw: gikan sa Abarim ngadto sa kapatagan sa Moab daplin sa Jordan.
48 Gikan sa kabukiran sa Abarim, nagkampo sila sa kapatagan sa Moab daplin sa Jordan atbang sa Jerico.