Gidid-an si David sa Pagtukod sa Templo (continued)

1044 sa wala pa si Cristo

Biblica® Open Ang Pulong sa Dios™ (OCCB)

Mga Salmo 2

1 Nganong nagkunsabo man ang mga nasod

ug nagplano ug daotan ang katawhan nga dili man kini molampos?

2 Ang ilang mga hari ug mga pangulo nagtigom

ug nangandam sa pagpakig-gira sa Ginoo

ug sa hari nga iyang pinili.

3 Nag-ingon sila, “Dili kita magpailalom

o magpasakop kanila.”

4 Apan ang ilang mga plano gikataw-an

ug gibiay-biay lang sa Ginoo nga naglingkod

sa iyang trono didto sa langit.

5 Sa iyang kapungot, gipasidan-an niya sila

ug nangahadlok sila.

6 Miingon siya, “Gipahimutang ko na sa Zion,

nga akong balaang bungtod, ang hari nga akong pinili.”

7 Miingon ang hari nga pinili sa Dios:

“Ipadayag ko ang giingon kanako sa Ginoo nga,

‘Ikaw ang akong anak,

ug niining adlawa nga nahimo kang hari,

ako nahimong imong amahan.

8 Pangayo kanako,

ug ihatag ko kanimo ang mga nasod sa tibuok kalibotan

aron imong panag-iyahon.

9 Imo silang gamhan,

ug wala gayod kanilay makabatok sa imong pagdumala.

Mahisama sila sa kolon nga imong dugmokon.’ ”

10 Busa, kamong mga hari ug mga pangulo sa kalibotan,

sabta ninyo kining mga pulonga,

ug pamatia ninyo ang mga pasidaan batok kaninyo.

11 Alagari ninyo ang Ginoo nga adunay pagtahod

ug paglipay kamo diha kaniya.

12 Tahora ninyo ang hari nga iyang pinili,

kay kon dili, masuko siya,

ug diha-diha laglagon kamo niya.

Bulahan kadtong mga tawo nga nagdangop sa Ginoo.

Mga Salmo 45

Ang awit alang sa maestro sa mga mag-aawit. Ang “Maskil” sa mga anak ni Kora. “Maskil” kini sa kasal. Awita kini sa tono sa awit nga “Mga Liryo.”

1 Ang akong huna-huna napuno sa matahom nga mga pulong

samtang gisulti ko ang akong balak alang sa hari.

Nahisama ako sa usa ka hanas nga manunulat.

2 Mahal nga Hari, ikaw ang labing ambongan sa tanan,

ug nagsulti ka sa mga pulong nga makaayo sa uban,

busa gipanalanginan ka kanunay sa Dios.

3 Itak-in ang imong espada, maisog nga hari;

gamhanan ka ug halangdon.

4 Sa imong pagkahalangdon,

sulong nga madaogon

tungod ug alang sa kamatuoran,

sa mga dinaog-daog, ug sa katarungan.

Pinaagi sa imong gahom

makahimo ka ug katingalahang mga buhat.

5 Pataopi sa imong hait nga mga pana

ang mga kasing-kasing sa imong mga kaaway.

Magpailalom ang mga nasod kanimo.

6 Ang imong gingharian, O Dios, wala gayoy kataposan,

ug matarong ang imong pagdumala sa imong gingharian.

7 Nahigugma ka sa katarong, apan nasilag ka sa kadaotan.

Busa gipili ka sa Dios, nga imong Dios,

ug gihatagan ka ug kalipay nga labaw

kaysa gihatag niya sa imong mga kauban.

8 Ang imong bisti humot sa mira, aloe, ug casia.

Lingawon ka sa honi sa mga instrumento

sa imong palasyo nga adunay mahalong mga dekorasyon.

9 Pipila sa imong halangdong

mga babaye mga anak sa mga hari.

Sa imong tuo anaa nagtindog ang imong mahimong rayna

nga nagsul-ob ug alahas

nga lunsayng bulawan gikan sa Ofir.

10 Pangasaw-onon sa hari, pamatia ang akong isulti:

Kalimti ang imong mga katagilungsod ug mga paryente,

11 kay nabihag ang hari sa imong katahom.

Tahora siya kay imo siyang agalon.

12 Ang mga lumulupyo sa Tiro apil na ang mga labing adunahan magdala

ug mga gasa kanimo aron hatagan mo sila ug maayong pagtagad.

13 Pagkatahom sa prinsesa sa palasyo.

Ang iyang bisti binordahan ug bulawan.

14 Sinul-oban sa iyang matahom nga bisti,

dad-on siya ngadto sa hari.

Ug ang mga dalaga nga iyang mga abay magsunod kaniya.

15 Dako kaayo ang ilang kalipay samtang nagsulod sila sa palasyo sa hari.

16 Mahal nga Hari, ang imong kaliwat nga mga lalaki mahimo usab nga mga hari

sama sa ilang mga katigulangan.

Himuon mo silang mga pangulo sa tibuok kalibotan.

17 Ang tanang henerasyon mahinumdom kanimo.

Busa dayegon ka sa kanasoran hangtod sa kahangtoran.

Mga Salmo 22

Ang awit alang sa maestro sa mga mag-aawit. Awita kini sa tono sa awit nga “Usa ka Buntag.” Ang awit ni David.

1 Dios ko, Dios ko, nganong gipasagdan mo ako?

Nganong layo ka man kanako?

Nag-agulo na ako sa pag-antos,

apan wala mo pa gihapon ako tabangi.

2 Dios ko, adlaw ug gabii nagpanawag ako kanimo,

apan wala mo ako tubaga, busa wala akoy pahulay.

3 Apan balaan ka,

ug naglingkod ka sa imong trono

nga ginadayeg sa mga Israelinhon.

4 Misalig kanimo ang among mga katigulangan ug giluwas mo sila.

5 Misangpit sila kanimo ug gitabangan mo sila.

Misalig sila kanimo ug wala mo sila pakyasa.

6 Gibiay-biay ako ug gitamay sa mga tawo.

Miingon sila nga sama ako sa usa ka ulod

ug dili tawo.

7 Ang makakita kanako mangyam-id ug magbugal-bugal kanako,

ug magpanglingo sila nga moingon,

8 “Nagsalig ka man kaha sa Ginoo, nganong wala ka man niya luwasa?

Kon tinuod nga nalipay siya kanimo,

nganong wala ka man niya tabangi?”

9 Apan ikaw ang nagpagawas kanako gikan sa tagoangkan sa akong inahan,

ug gikan sa masuso pa ako gipanalipdan mo na ako.

10 Sukad sa akong pagkahimugso,

gitugyan na ako kanimo ug ikaw lang ang akong Dios.

11 Busa ayaw pagpalayo kanako,

kay hapit na moabot ang kalisod

ug walay laing motabang kanako.

12 Gilibotan ako sa daghang mga kaaway;

sama sila sa kusgang mga torong baka sa Basan.

13 Sama usab sila sa liyon nga nagngulob ug nagnganga,

ug andam na sa pagkunis-kunis kanako.

14 Nawad-an na akog kusog; sama kini sa tubig nga giyabo,

ug ang tanan kong mga bukog murag nangalisa.

Nawad-an na akog kaisog; sama ako sa kandila nga naupos.

15 Nawad-an na akog kusog; sama ako sa mibagtik nga yuta.

Ug ang akong dila miungot sa akong alingagngag.

Ginoo, gipasagdan mo ako nga hapit nang mamatay.

16 Gilibotan ako sa daotang mga tawo nga daw sa mga iro nga mialirong kanako.

Gihambat nila ang akong mga kamot ug mga tiil.

17 Nanggawas na ang akong mga bukog,

ug gitutokan lang nila ako.

18 Gibahin-bahin nila ang akong mga bisti pinaagi sa hulbot-hulbot.

19 Apan ikaw, Ginoo, ayaw pagpahilayo kanako.

Ikaw nga akong kusog, pagdali ug tabangi ako.

20 Luwasa ako gikan sa espada sa akong mga kaaway;

luwasa ang akong kinabuhi gikan nianang mga iro.

21 Luwasa ako gikan nianang mga liyon.

Tubaga ang akong pag-ampo;

luwasa ako gikan sa sungay nianang mga torong baka.

22 Imantala ko sa akong mga katagilungsod ang imong gipanghimo.

Dayegon ka nako diha sa ilang mga panagtigom.

23 Kamong nagtahod sa Ginoo, dayega ninyo siya!

Kamong mga katawhan sa Israel, nga mga kaliwat ni Jacob,

pasidunggi ug tahora ninyo ang Ginoo!

24 Kay wala niya gipakawalay-bili ang mga pag-antos sa mga kabos.

Wala niya sila talikdi;

gidungog niya ang ilang pagpangayo ug tabang.

25 Hatagi ako, Ginoo, sa kadasig

sa pagdayeg kanimo diha sa panagtigom sa imong katawhan.

Atubangan sa mga nagtahod kanimo tumanon ko

ang akong gisaad nga mga halad kanimo.

26 Dapiton ko ang mga kabos sa pagkaon ug mangabusog sila.

Ang mga nagdangop kanimo magdayeg kanimo.

Hinaut pa nga magmauswagon ang ilang mga kinabuhi.

27 Ang tibuok kalibotan mahinumdom

ug mobalik kanimo, Ginoo,

ug simbahon ka nila.

28 Kay ikaw ang hari,

ug ikaw ang nagdumala sa mga nasod.

29 Mosimba gayod kanimo

ang tanang mga adunahan sa kalibotan.

Apil ang tanang mga tawo nga hapit nang mamatay moyukbo kanimo.

Ug bisan kadtong nangamatay na,

30 ang ilang mga kaliwat moalagad kanimo.

Tudloan mahitungod kanimo, Ginoo,

ang umaabot nga mga henerasyon.

31 Silang wala pa mangatawo suginlan unya

nga giluwas mo ang imong katawhan.

Ug ikaw gayod mismo ang mihimo niini.