Si David sa En Gedi

1058 sa wala pa si Cristo

Biblica® Open Ang Pulong sa Dios™ (OCCB)

1 Samuel 23:29–24:22

29 Gikan didto, miadto si David sa En Gedi ug mipuyo sa mga kuta didto.

24:1 Sa pagbalik ni Saulo gikan sa pagpakig-gira batok sa mga Filistihanon, gisultihan siya nga atua si David sa kamingawan sa En Gedi. 2 Busa nagpili siyag 3,000 ka mga tawo gikan sa tibuok Israel ug milakaw sa pagpangita kang David ug sa mga tawo niini didto duol sa kabatoan nga gipuy-an sa mga kanding nga ihalas.

3 Nakaabot si Saulo sa toril sa mga karnero nga anaa mahimutang sa daplin sa dalan, ug adunay langub didto. Misulod si Saulo sa langub aron magtuman sa sugo sa lawas. Didto diay sa kinasuloran nga bahin sa langub nagtago si David ug ang iyang mga tawo.

4 Miingon ang mga tawo ni David kaniya, “Mao na gayod kini ang higayon nga giingon sa Ginoo nga itugyan niya kanimo ang imong kaaway ug bahala ka na kon unsa ang imong gustong buhaton kaniya.” Unya mihinay-hinay ug duol si David ngadto sa nahimutangan ni Saulo ug giputol niya ang tumoy sa bisti niini. Wala kini mamatikdi ni Saulo.

5 Apan pagkahuman, gihasol si David sa iyang konsensya tungod sa iyang pagputol sa sidsid sa bisti ni Saulo. 6 Miingon siya sa iyang mga tawo, “Hinaut nga dili motugot ang Ginoo nga maghimo akog daotan batok sa akong agalon, ang hari nga pinili sa Ginoo.” 7 Pinaagi niining iyang gipanulti gibadlong niya ang iyang mga tawo, ug wala niya sila tugoti nga patyon si Saulo.

Mibiya si Saulo sa langub ug mipadayon sa paglakaw. 8 Unya migawas si David gikan sa langub ug gitawag si Saulo, “Mahal nga Hari!” Sa dihang milingi si Saulo, miluhod si David sa pagtahod kaniya.

9 Unya miingon si David kang Saulo, “Nganong mituo ka sa mga tawo nga nag-ingon kanimo nga nagtinguha ako sa pagpatay kanimo? 10 Karong adlawa nakita mo mismo kon giunsa ka pagtugyan sa Ginoo kanako didto sa sulod sa langub. Giingnan ako sa uban kong mga tawo nga patyon ka, apan wala ka nako patya. Miingon ako kanila nga dili ko hilabtan ang akong agalon tungod kay pinili siya sa Ginoo. 11 Amahan, tan-awa ang bahin sa imong bisti nga akong gikuptan. Giputol ko ang sidsid sa imong bisti apan wala ka nako patya. Nagpamatuod kini nga wala akoy tuyo sa pagpasipala kanimo o sa pagrebelde kanimo. Wala ako makasala batok kanimo apan nagtinguha ka sa pagpatay kanako.

12 “Hinaut nga ang Ginoo mao ang maghukom kanatong duha, ug hinaut nga panimaslan ka niya sa imong daotang gihimo kanako. Apan ako dili gayod manghilabot kanimo, 13 sama sa panultihon nga nag-ingon, ‘Ang daotan lang nga tawo ang naghimog daotan.’ Busa dili gayod ako manghilabot kanimo. 14 Ikaw nga usa ka hari sa Israel naglisod-lisod gayod sa pagpangita kanako. Ngano, kinsa ba gayod ako nga imo mang gukdon? Sama lang ako sa usa ka patay nga iro o pulgas. 15 Hinaut nga ang Ginoo mao ang maghukom ug modesisyon kon kinsa ang sad-an kanatong duha. Hinaut nga dunggon niya ako, labanan ug luwason gikan sa imong mga kamot.”

16 Pagkahuman ug sulti ni David, miingon si Saulo, “Ikaw ba gayod kana David, anak ko?” Ug mihilak siya ug kusog. 17 Miingon pa gayod siya, “Mas matarong ka kay kanako. Gibuhatan ka nako ug daotan apan gibalosan mo akog maayo. 18 Karong adlawa gipakita mo kanako ang imong kaayo. Gitugyan ako sa Ginoo kanimo, apan wala mo ako patya. 19 Ang uban, kon makita nila ang ilang kaaway, dili nila kini pasagdan nga makaikyas. Hinaut nga balosan ka sa Ginoo sa kaayo nga gipakita mo kanako karong adlawa. 20 Nasayod ako nga mahimo ka gayong hari, ug ang gingharian sa Israel molig-on ubos sa imong pagdumala. 21 Karon, ipanumpa kanako sa ngalan sa Ginoo nga dili mo patyon ang akong mga kaliwat, aron dili mawala ang ngalan sa akong pamilya.”

22 Busa nanumpa si David kang Saulo. Unya mipauli si Saulo, apan si David ug ang iyang mga tawo mibalik sa ilang kuta.

Mga Salmo 57–58

Ang awit alang sa maestro sa mga mag-aawit. Awita kini sa tono sa awit nga “Ayaw Laglaga.” Ang “Miktam” ni David sa dihang miikyas siya gikan kang Saulo didto sa langub.

1 O Dios, Kaloy-i ako, kay kanimo ako nangayo

ug pagpanalipod sama sa mga piso sa langgam

nga motago ilalom sa mga pako sa ilang inahan.

Magpailalom ako sa imong pagpanalipod hangtod

nga mahuman ang mga katalagman.

2 Nagpakitabang ako kanimo, Labing Halangdong Dios,

kanimo nga nagtuman sa imong katuyoan kanako.

3 Gikan sa langit, magpadala kag tabang

aron sa pagluwas kanako.

Laglagon mo ang mga nanulong kanako.

Ipakita mo ang imong gugma

ug pagkamatinumanon kanako.

4 Gilibotan ako sa mga kaaway

nga daw sa mga liyon

nga andam sa pagkunis-kunis ug tawo.

Ang ilang mga ngipon daw mga bangkaw ug mga pana.

Ang ilang mga dila daw hait nga mga espada.

5 Ipakita, O Dios, ang imong pagkagamhanan

diha sa kalangitan ug sa tibuok kalibotan.

6 Nabalaka ako kay nagbutang ang akong mga kaaway

ug lit-ag alang kanako.

Nagkalot silag lawom nga bangag sa akong agianan,

apan sila ra usab mismo ang nahulog niini.

7 Nagsalig gayod ako kanimo, O Dios;

awitan ka nako ug mga pagdayeg.

8 Momata ako samtang nagbanag-banag pa,

ug andamon ko ang akong mga instrumento nga adunay mga kuwerdas

sa pagdayeg kanimo sa tibuok kong kasing-kasing.

9 Dayegon ka nako, Ginoo, taliwala sa kanasoran.

Awitan ka nako taliwala sa mga katawhan.

10 Kay ang imong gugma ug pagkamatinumanon dili gayod masukod;

mas taas pa kini sa kalangitan.

11 O Dios, ipakita ang imong pagkagamhanan

diha sa kalangitan ug sa tibuok kalibotan.

Ang awit alang sa maestro sa mga mag-aawit. Awita kini sa tono sa awit nga “Ayaw Laglaga.” Ang “Miktam” kini ni David.

58:1 Kamong mga pangulo,

matarong ba ug makiangayon

ang inyong paghukom sa mga tawo?

2 Dili! Kay ang inyong gihuna-huna

mao lang ang paghimo ug daotan.

Nanghasi kamo sa inyong mga dapit.

3 Ang mga daotan daan nang daotan

ug bakakon sukad pa sa ilang pagkatawo.

4-5 Malala sila sama sa mga bitin.

Sama sila sa kobra nga dili mamati

sa honi sa hanas nga salamangkiro.

6 O Ginoong Dios, ibtig mga ngipon ug bangkil

ang akong mga kaaway nga daw mga liyon.

7 Mawala unta sila nga daw tubig nga mihubas.

Ug kon mamana sila, dili unta sila makaigo.

8 Mahisama unta sila sa

hilà-hilà nga natunaw samtang nagkamang,

o sa bata nga gipanganak nga patay,

nga wala gayod makakita ug kahayag.

9 Dalia ang paglaglag kanila, bata man o tigulang,

mas dali pa kaysa pag-init sa kolon nga gitak-ang sa kalayo.

10 Malipay ang mga matarong kon makita nila

nga gipanimaslan na sa Dios ang mga daotan,

ug nagbanaw na ang ilang dugo.

11 Unya moingon ang mga tawo,

“Tinuod gayod nga adunay ganti alang sa mga matarong,

ug adunay Dios nga mohukom sa kalibotan.”

Mga Salmo 63

Ang awit ni David sa dihang didto siya sa kamingawan sa Juda.

1 O Dios, ikaw ang akong Dios!

Nangandoy gayod ang akong kalag kanimo,

sama nga mangandoy ako

ug tubig diha sa disyerto.

2 Nakita ko gayod ang imong pagkagamhanan

ug pagkahalangdon diha sa imong balaang puloy-anan.

3 Dayegon ka nako tungod kay ang imong gugma

mas bililhon pa kaysa kinabuhi.

4 Pasalamatan ka nako samtang aduna pa akoy kinabuhi.

Ibayaw ko ang akong mga kamot sa pag-ampo kanimo.

5 Matagbaw ako sama sa tawo nga nabusog pag-ayo sa kombira.

Ug magdayeg ako kanimo nga naghugyaw sa kalipay.

6 Samtang naghigda ako gihinumdoman ka nako.

Sa tibuok gabii namalandong ako kanimo,

7 kay ikaw ang nagtabang kanako.

Maghugyaw ako sa kalipay ilalom sa imong pagpanalipod.

8 Nagsalig ako kanimo,

ug gikuptan mo ako aron dili ako maunsa.

9 Ang mga nagtinguha sa pagpatay kanako mahiadto sa dapit sa mga patay.

10 Mangamatay sila sa gira,

ug ang ilang mga patayng lawas kan-on sa ihalas nga mga iro.

11 Maglipay ang hari tungod sa gihimo sa Dios kaniya.

Malipay usab ang tanang nanumpa sa ngalan sa Dios.

Apan patak-omon sa Dios ang mga baba sa mga bakakon.