యూదులైన, యూదేతరులైన క్రైస్తవులకు పేతురు వ్రాస్తున్నాడు

హింసాకాలంలో తన పత్రిక ఆరంభంలో పేర్కొన్న అన్యమత దేశాలలో ఆశ్రయం పొందిన యూదులకు పేతురు తన మొదటి పత్రిక వ్రాస్తున్నాడు. అలాగే విశ్వాసంలోకి మారిన యూదేతరులకు కూడా వ్రాస్తున్నాడు. తమ మతం కోసం సంతోషంగా బాధలు సహించమని వారిని ప్రోత్సహించడానికీ, తమ శత్రువుల అపనిందలను సిగ్గుపరచేలా పరిశుద్ధమైన, నిందారహితమైన జీవితం గడపవలసిన అవసరాన్ని వారికి నొక్కి చెప్పడానికీ అతడు వ్రాస్తున్నాడు.

క్రీ.శ. 65 లేదా 66

ఇండియన్ రివైజ్డ్ వెర్షన్ (IRV) - తెలుగు -2019 (IRVTEL)

యూదులైన, యూదేతరులైన క్రైస్తవులకు పేతురు అభివందనాలు తెలుపుతున్నాడు

ప్రవక్తల ద్వారా వెల్లడైన దేవుని ముందస్తు జ్ఞానం ప్రకారం, పరిశుద్ధాత్మ కార్యం ద్వారా సువార్తకు విధేయులు కావడానికి ఎన్నుకోబడిన యూదులకూ యూదేతరులకూ పేతురు అభివందనం, ఆశీర్వాదం తెలియజేస్తున్నాడు. దీని ద్వారా వారు క్రీస్తు ప్రాయశ్చిత్త రక్తం వల్ల కలిగే ఆశీర్వాదాలన్నిటిలో పాలుపొందుతారు.

పేతురు రాసిన మొదటి పత్రిక 1:1–2

1 యేసు క్రీస్తు అపొస్తలుడు అయిన పేతురు పొంతు, గలతీయ, కప్పదొకియ, ఆసియ, బితునియ అనే ప్రాంతాల్లో చెదరిపోయి పరదేశులుగా ఉంటున్న ఎంపిక అయిన వారికి శుభమని చెప్పి రాస్తున్న సంగతులు. 2 తండ్రి అయిన దేవుని భవిష్యద్‌ జ్ఞానాన్ని బట్టి, పరిశుద్ధాత్మ వలన పవిత్రీకరణ పొంది, యేసు క్రీస్తుకు విధేయత చూపడానికి ఆయన రక్త ప్రోక్షణకు వచ్చిన మీపై కృప నిలిచి ఉండుగాక. మీకు శాంతిసమాధానం విస్తరించు గాక.

వారి నూతన జన్మ కోసం పేతురు దేవుణ్ణి స్తుతిస్తున్నాడు

యేసు క్రీస్తు పునరుత్థానం ద్వారా యూదులకూ యూదేతరులకూ మరణానంతర జీవితం పట్ల నిరీక్షణ కలిగేలా ఆత్మసంబంధమైన జన్మను అనుగ్రహించినందుకు పేతురు దేవుణ్ణి స్తుతిస్తున్నాడు. దీని ద్వారా వారు నాశనం కాని వారసత్వంలో పాలుపొందుతారు. రకరకాల శ్రమల వల్ల దుఃఖిస్తున్నా, ఈ రక్షణ నిరీక్షణలో వారు ఎంతో ఆనందించాలి. వారి విశ్వాసాన్ని నిరూపించడానికి ఈ శ్రమలు అవసరం. ఆ విశ్వాసపు పరీక్ష బంగారం పరీక్ష కంటే ఎంతో విలువైనది, ఎందుకంటే యేసు క్రీస్తు రాకడలో అది వారికి శాశ్వతమైన మహిమనూ ప్రశంసనూ సంపాదిస్తుంది. ప్రస్తుతం ఆయన వారికి కనిపించకపోయినా, ఆయనను రక్షకునిగా భావించి వారు ఆయనలో ఎంతో ఆనందిస్తారు. తమ విశ్వాసానికి ప్రతిఫలమైన ఆత్మల రక్షణను ఆయన నుండి పొందుతామని వారికి తెలుసు. ప్రవక్తలు ఈ రక్షణను ముందుగా ప్రకటించారు. క్రీస్తు బాధలనూ, వాటి తరువాత వచ్చే మహిమలనూ ఆశీర్వాదాలనూ దేవుని ఆత్మ ముందుగా తెలియజేసినప్పుడు, అది ఏ కాలాన్ని, ఏ ప్రజలను సూచిస్తుందో తెలుసుకోవడానికి వారు శ్రద్ధగా పరిశోధించారు. ఇప్పుడు అపొస్తలులు లోకానికి ప్రకటించిన విషయాలలో తాము సేవ చేస్తున్నది తమ కోసం కాదనీ, తరువాతి కాలపు ప్రజల కోసమేననీ పరిశుద్ధాత్మ ప్రవక్తలకు వెల్లడించాడు. ఆ ఉద్దేశం కోసం అపొస్తలులకు అదే పరిశుద్ధాత్మ శక్తినిచ్చాడు. ఈ మర్మాలను మనుషులతో పాటు దేవదూతలు కూడా “తొంగి చూడాలని ఆశపడుతున్నారు” (నిర్గమకాండము 25:20).

పేతురు రాసిన మొదటి పత్రిక 1:3–12

3 మన ప్రభు యేసు క్రీస్తు తండ్రి అయిన దేవునికి స్తుతులు కలుగు గాక. యేసు క్రీస్తు చనిపోయిన తరువాత ఆయనను సజీవునిగా లేపడం ద్వారా దేవుడు తన మహా కనికరాన్ని బట్టి మనకు కొత్త జన్మనిచ్చాడు. ఇది మనకు ఒక సజీవమైన ఆశాభావాన్ని కలిగిస్తున్నది.

4 దీని మూలంగా మనకు ఒక వారసత్వం లభించింది. ఇది నాశనం కాదు, మరక పడదు, వాడిపోదు, ఇది పరలోకంలో మీకోసం ఎప్పుడూ భద్రంగా ఉండేది. 5 ఆఖరి రోజుల్లో వెల్లడి కావడానికి సిద్ధంగా ఉన్న రక్షణ కోసం, విశ్వాసం ద్వారా దేవుని బల ప్రభావాలు మిమ్మల్ని కాపాడుతూ ఉన్నాయి. 6 రకరకాల విషమ పరీక్షల వలన ఇప్పుడు మీరు విచారించవలసి వచ్చినా దీన్ని బట్టి మీరు ఆనందిస్తున్నారు.

7 నాశనం కాబోయే బంగారం కంటే విశ్వాసం ఎంతో విలువైనది. బంగారాన్ని అగ్నితో శుద్ధి చేస్తారు గదా! దాని కంటే విలువైన మీ విశ్వాసం ఈ పరీక్షల చేత పరీక్షకు నిలిచి, యేసు క్రీస్తు ప్రత్యక్షమయ్యేటప్పుడు మీకు మెప్పునూ మహిమనూ ఘనతనూ తెస్తుంది. 8 మీరాయన్ని చూడకపోయినా ఆయన్ని ప్రేమిస్తున్నారు. ఇప్పుడు ఆయన్ని చూడకుండానే విశ్వసిస్తూ మాటల్లో చెప్పలేనంత దివ్య సంతోషంతో ఆనందిస్తున్నారు. 9 మీ విశ్వాసానికి ఫలాన్ని అంటే మీ ఆత్మల రక్షణ పొందుతున్నారు.

10 మీకు కలిగే ఆ కృపను గురించి ప్రవచించిన ప్రవక్తలు ఈ రక్షణను గురించి ఎంతో శ్రద్ధతో విచారించి పరిశీలించారు. 11 వారు తమలోని క్రీస్తు ఆత్మ ముందుగానే తెలియజేసిన విషయాలు అంటే క్రీస్తు పొందనైయున్న బాధలు, ఆ తరువాత రాబోయే గొప్ప విషయాలు ఎప్పుడు, ఎలా జరగబోతున్నాయి అని తెలుసుకొనేందుకు ఆలోచించి పరిశోధించారు. 12 తమ కోసం కాక మీ కోసమే తాము సేవ చేశారనే సంగతి ఆ ప్రవక్తలకు వెల్లడి అయింది. పరలోకం నుంచి దిగివచ్చిన పరిశుద్ధాత్మ ద్వారా మీకు సువార్త ప్రకటించినవారు ఈ విషయాలు మీకిప్పుడు తెలియజేశారు. దేవదూతలు కూడా ఈ సంగతులు తెలుసుకోవాలని ఎంతో ఆశపడుతున్నారు.

క్రీస్తు రక్తంతో విమోచించబడినవారై, పరిశుద్ధమైన భయంతో జీవించండి

క్రీస్తు బాధల ద్వారా లభించిన ఆశీర్వాదాలను బట్టి, తమ పరీక్షలన్నిటిలో ధైర్యం తెచ్చుకోమని పేతురు వారిని కోరుతున్నాడు. క్రీస్తు ప్రత్యక్షమయ్యే రోజున వారికి వాగ్దానం చేయబడిన నిత్యజీవ నిరీక్షణ వారి జీవితాంతం వారికి ఆధారంగా ఉంటుంది. విశ్వాసంలోకి మారకముందు తాము అనుసరించిన దురాశలను వారు విడిచిపెట్టి, మోషే వ్రాసినట్లు, తన పిల్లలుగా ఉండడానికి వారిని పిలిచిన దేవుని పరిశుద్ధతను అనుకరించాలి (లేవీయకాండము 19:2; 1 పేతురు 5:10; 2:21; 3:9). పక్షపాతం లేకుండా ప్రతి మనిషికీ అతని సొంత క్రియలను బట్టి తీర్పు జరుగుతుంది కాబట్టి, భూమిపై తాము గడిపే కాలాన్ని భక్తిపూర్వకమైన భయంతో గడపమని వారికి బోధిస్తున్నాడు. తమ పితరుల నుండి వారసత్వంగా పొందిన మూఢనమ్మకాలు, సంప్రదాయాలు లేదా భ్రష్టమైన ఆరాధనా ఆచారాల నుండి, నిర్దోషమైన పాపపరిహార బలివంటి క్రీస్తు రక్తం ద్వారా వారు విమోచించబడ్డారు కాబట్టి మరింతగా అలా జీవించాలి. లోకానికి పునాది వేయకముందే దేవుని సంకల్పంలో క్రీస్తు నియమించబడ్డాడు. ధర్మశాస్త్రంలోని బలి ఆయనకు పూర్వఛాయగా ఉంది. అయితే చివరి యుగమైన సువార్త యుగంలో ఆయన యూదేతరులకు కూడా వెల్లడయ్యాడు. క్రీస్తు చేసిన ఈ బలిలో చూపబడిన దేవుని కరుణపై విశ్వాసం ద్వారా, ఆయనను మృతులలో నుండి లేపి పరలోక మహిమకు హెచ్చించిన దేవునిలో వారు విశ్వాసముంచుతున్నారు. దేవుని వాగ్దానాల నెరవేర్పులో వారి విశ్వాసం స్థిరపడి, క్రీస్తు ద్వారా నిత్యమహిమ పొందుతామనే వారి నిరీక్షణ దేవునిలో ఉండాలన్నదే దీని ఉద్దేశం.

పేతురు రాసిన మొదటి పత్రిక 1:13–21

13 కాబట్టి మీ మనసు అనే నడుము కట్టుకోండి. స్థిర బుద్ధితో, యేసు క్రీస్తు ప్రత్యక్షమైనప్పుడు మీకు కలిగే కృపపై సంపూర్ణమైన ఆశాభావం కలిగి ఉండండి.

14 విధేయులైన పిల్లలై ఉండండి. మీ పూర్వపు అజ్ఞాన దశలో మీకున్న దురాశలను అనుసరించి ప్రవర్తించవద్దు.

15 మిమ్మల్ని పిలిచినవాడు పరిశుద్ధుడు. అలాగే మీ ప్రవర్తన అంతటిలో పరిశుద్ధులై ఉండండి.

16 ఎందుకంటే, “నేను పరిశుద్ధుడను కాబట్టి మీరూ పరిశుద్ధులుగా ఉండండి” అని రాసి ఉంది.

17 ప్రతి ఒక్కరి పని గురించి పక్షపాతం లేకుండా తీర్పు తీర్చే దేవుణ్ణి మీరు, “తండ్రీ” అని పిలిచే వారైతే భూమిమీద మీరు జీవించే కాలమంతా భయభక్తులతో గడపండి.

18 మీ పూర్వీకుల నుంచి పారంపర్యంగా వచ్చిన వ్యర్ధమైన జీవన విధానం నుంచి దేవుడు మిమ్మల్ని వెల ఇచ్చి విమోచించాడు. వెండి బంగారాల లాంటి అశాశ్వతమైన వస్తువులతో కాదు.

19 అమూల్యమైన రక్తంతో, అంటే ఏ లోపం, కళంకం లేని గొర్రెపిల్ల లాంటి క్రీస్తు అమూల్య రక్తం ఇచ్చి, మిమ్మల్ని విమోచించాడు. 20 విశ్వం ఉనికిలోకి రాక ముందే దేవుడు క్రీస్తుని నియమించాడు. అయితే ఈ చివరి రోజుల్లోనే దేవుడు ఆయన్ని మీకు ప్రత్యక్ష పరిచాడు. 21 ఆయన ద్వారానే మీరు దేవుణ్ణి నమ్ముతున్నారు. దేవుడాయనను చనిపోయిన వారిలో నుంచి సజీవంగా లేపి ఆయనకు మహిమ ఇచ్చాడు. కాబట్టి మీ విశ్వాసం, ఆశాభావం దేవుని మీదే ఉన్నాయి.

మళ్లీ జన్మించినవారై, ఒకరినొకరు ప్రేమించండి

క్రీస్తు యేసులో విశ్వాసముంచడం ద్వారా శరీర దురాశల నుండి హృదయాలు శుద్ధి చేయబడినవారిని, మళ్లీ జన్మించిన సోదరులుగా ఒకరినొకరు ప్రేమించమని పేతురు కోరుతున్నాడు. కపటమైన ఆచారాలతోనూ మాటలతోనూ కాకుండా, శారీరక వాంఛలు లేని నిర్మలమైన హృదయంతో ప్రేమించాలి. వారు మళ్లీ జన్మించినది మానవ తల్లిదండ్రుల సంతానం కావడం ద్వారా కాదు, దైవికమైన, పరలోక సంబంధమైన మూలం ద్వారా, అంటే సజీవుడైన దేవుని బోధ ద్వారా. ఆ బోధ శాశ్వతంగా నిలుస్తుంది.

పేతురు రాసిన మొదటి పత్రిక 1:22–25

22 సత్యానికి లోబడడం ద్వారా మీరు మీ మనసులను పవిత్రపరచుకున్నారు. తద్వారా యథార్ధమైన సోదర ప్రేమను పొందారు. అందుచేత ఒకరినొకరు హృదయ పూర్వకంగా, గాఢంగా ప్రేమించుకోండి. 23 మీరు నాశనమయ్యే విత్తనం నుంచి కాదు, ఎప్పటికీ ఉండే సజీవ దేవుని వాక్కు ద్వారా, నాశనం కాని విత్తనం నుంచి మళ్ళీ పుట్టారు.

24 “ఎందుకంటే మానవులంతా గడ్డిలాంటి వారు.

వారి వైభవమంతా గడ్డి పువ్వు లాంటిది.

గడ్డి ఎండిపోతుంది. పువ్వు రాలిపోతుంది

25 గానీ ప్రభువు వాక్కు ఎప్పటికీ నిలిచి ఉంటుంది.”

ఈ సందేశమే మీకు సువార్తగా ప్రకటించడం జరిగింది.

దేవుని ఆత్మసంబంధమైన ఆలయంలో సజీవ రాళ్లు

తమ పూర్వ స్వభావంలోని దుష్ట ప్రవృత్తులన్నిటినీ విడిచిపెట్టి, దైవకృప ద్వారా మళ్లీ జన్మించిన శిశువులుగా సువార్త అనే స్వచ్ఛమైన పాలను ఆశించమని పేతురు వారిని కోరుతున్నాడు. అలా వారి నూతన స్వభావం పోషణ పొంది పరిపక్వతకు చేరుతుంది. ఎందుకంటే తమ రెండవదైన ఆత్మసంబంధమైన జన్మలో వారు ఇప్పటికే ప్రభువు మంచితనాన్నీ శ్రేష్ఠతనూ రుచి చూశారు (కీర్తనలు 34:8). సజీవమైన పునాది రాయి దగ్గరకు వచ్చినట్లు విశ్వాసంతో ఆయన దగ్గరకు వచ్చి, ఆయన మీద కట్టబడుతూ, ఆయన జీవంలో పాలుపొందుతున్నారు. అలా వారు ఆత్మసంబంధమైన ఆలయంగానూ యాజక సమూహంగానూ ఏర్పడి (నిర్గమకాండము 19:6; ప్రకటన 1:6), క్రీస్తు ద్వారా ప్రార్థనా స్తుతుల బలులు అర్పించడానికి నియమించబడ్డారు. అందుకే దేవుని నూతన ఆలయానికి పునాదిగా సీయోనులో “ఎన్నుకోబడిన, అమూల్యమైన మూలరాయి” వేయబడుతుందని యెషయా ప్రకటించాడు (యెషయా 28:16). అది కట్టడానికి రెండు వైపులుగా ఉన్న యూదులనూ యూదేతరులనూ ఒకే సంఘంగా కలుపుతుంది (ఎఫెసీయులు 2:21). విశ్వసించేవారు ఈ కట్టడానికి చెందినవారు. అయితే అవిధేయుల విషయంలో, తిరస్కరించబడిన ఈ పునాది రాయి దేవుని నూతన ఆలయానికి “మూలరాయి అయింది” అనీ (కీర్తనలు 118:22), క్రీస్తులో విశ్వాసముంచనివారికి “అడ్డురాయి” అయిందనీ వ్రాయబడింది. యెషయా ముందుగా చెప్పినట్లు వారు దానికి తగిలి పడి ముక్కలవుతారు (యెషయా 8:14–15). ఒకప్పుడు యూదుల సంఘానికీ, దేవునితో నిబంధనలోకి తీసుకోబడిన వారందరికీ ఇవ్వబడిన బిరుదులతో పేతురు క్రైస్తవుల గొప్ప ఆధిక్యతలను వర్ణిస్తున్నాడు.

పేతురు రాసిన మొదటి పత్రిక 2:1–10

1 ప్రభువు దయగల వాడని మీరు రుచి చూశారు కాబట్టి 2 అన్ని రకాల దుష్టత్వం, మోసం, వేషధారణ, అసూయ, సమస్త దూషణ మాటలను మానండి. 3 కొత్తగా పుట్టిన బిడ్డల్లా, స్వచ్ఛమైన ఆత్మ సంబంధమైన పాలను ఆశించండి. దాని ద్వారా మీరు రక్షణలో ఎదుగుతారు.

4 మనుషులు తిరస్కరించినా, దేవుడు ఎన్నుకున్నదీ విలువైనదీ, సజీవమైన రాయి అయిన ప్రభువు దగ్గరికి రండి. 5 ఆధ్యాత్మిక గృహంగా కట్టడానికి వాడే సజీవమైన రాళ్ల లాగా మీరున్నారు. దాని వలన, యేసు క్రీస్తు ద్వారా దేవునికి అంగీకారమైన ఆత్మ సంబంధమైన బలులు అర్పించడానికి పరిశుద్ధ యాజకులుగా ఉండగలరు.

6 ఎందుకంటే లేఖనంలో ఇలా రాసి ఉంది,

“నేను సీయోనులో మూల రాయి వేస్తున్నాను.

అది విలువైనదీ ఎన్నిక అయినదీ ప్రాముఖ్యమైనదీ.

ఆయనను నమ్మేవారెవరూ సిగ్గు పడరు.”

7 కాబట్టి విశ్వసిస్తున్న మీకు ఇది గౌరవప్రదమైనది. అయితే విశ్వసించని వారికి,

“ఇల్లు కట్టే వారు నిరాకరించిన రాయి, మూలకు తలరాయి అయింది.”

8 అది “అడ్డురాయి, అడ్డుబండ” అయింది.

వారు వాక్యానికి అవిధేయులై తొట్రుపడుతున్నారు. దాని కోసమే దేవుడు వారిని నియమించాడు.

9 చీకటిలో నుంచి అద్భుతమైన వెలుగులోకి మిమ్మల్ని పిలిచిన ఆయన ఉత్తమ గుణాలను మీరు ప్రకటించాలి. అందుకోసం మీరు ఎన్నికైన వంశంగా రాచరిక యాజక బృందంగా, పరిశుద్ధ జనాంగంగా, దేవుని ఆస్తి అయిన ప్రజగా ఉన్నారు.

10 ఒకప్పుడు మీరు ప్రజ కాదు.

కానీ ఇప్పుడు దేవుని ప్రజ.

పూర్వం మీరు కనికరానికి నోచుకోలేదు.

అయితే ఇప్పుడు కనికరం పొందారు.

పరదేశులుగా, ప్రతి మానవ ప్రభుత్వానికి లోబడండి

పూర్వకాలపు ఇశ్రాయేలీయులను సూచిస్తూ (హెబ్రీయులు 11:13), భూమిపై వారసత్వం లేని పరదేశులుగా, యాత్రికులుగా పరలోక దేశాన్ని వెదకమనీ, ఆత్మను బానిసగా చేసే లేదా నాశనం చేసే శరీర దురాశలకు దూరంగా ఉండమనీ పేతురు వారిని కోరుతున్నాడు. నిజంగానే వారు ఆసియలో, పొంతులో, ఇతర దేశాలలో పరదేశులుగా ఉన్నారు. తమ సత్క్రియలు తమ శత్రువుల అపనిందలను ఖండించేలా వారు జీవించాలి. తమ మతం వల్ల వారు రాజులకూ అధికారులకూ లోబడడానికి ఇష్టపడరని వాదించే అవివేకుల అజ్ఞానాన్ని మౌనపరచేలా, ప్రభువు కోసం ప్రతి విధమైన మానవ ప్రభుత్వానికి వారు లోబడాలి. దేవుడు ఎన్నుకున్న ప్రజలుగా యూదులు తమ సొంత చట్టాల ప్రకారం పాలించబడే స్వతంత్రులమని గర్వించేవారు. దీన్ని మనస్సులో ఉంచుకొని, తమ అంతరంగంలో తమ మత నియమాల ప్రకారం నడుచుకోమనీ, అయితే యూదులు చేసినట్లు తమ స్వాతంత్ర్యాన్ని తిరుగుబాటుకు ముసుగుగా ఉపయోగించకుండా దేవుని సేవకులుగా జీవించమనీ పేతురు వారిని కోరుతున్నాడు.

పేతురు రాసిన మొదటి పత్రిక 2:11–17

11 ప్రియులారా, మీరీ లోకంలో పరదేశులుగా, బాటసారులుగా ఉన్నారు. కాబట్టి మీ ఆత్మకు విరోధంగా పోరాటం చేసే శరీర దురాశలు విసర్జించాలని వేడుకుంటున్నాను. 12 యూదేతరులు మిమ్మల్ని దుర్మార్గులని దూషిస్తూ ఉంటే, వారు మీ మంచి పనులు చూసి, దేవుడు దర్శించే రోజున ఆయనను మహిమ పరచేలా, వారి మధ్య మీ మంచి ప్రవర్తన చూపించండి.

13 ప్రతి మానవ అధికారానికీ ప్రభువును బట్టి లోబడి ఉండండి. 14 రాజు అందరికీ అధిపతి అనీ, అధికారులు దుర్మార్గులను శిక్షించడానికీ, మంచి వారిని మెచ్చుకోడానికీ ఆయన పంపిన వారనీ వారికి లోబడి ఉండండి. 15 ఎందుకంటే మీరు ఈ విధంగా మంచి చేస్తూ తెలివి తక్కువగా మాట్లాడే బుద్ధిహీనుల నోరు మూయించడం దేవుని చిత్తం.

16 స్వేచ్ఛ పొందిన వారుగా దుర్మార్గాన్ని కప్పి పెట్టడానికి మీ స్వేచ్ఛను వినియోగించక, దేవుని సేవకులుగా ఉండండి. 17 అందరినీ గౌరవించండి. తోటి సోదరులను ప్రేమించండి, దేవునికి భయపడండి, రాజును గౌరవించండి.

క్రీస్తు బాధపడినట్లే సేవకులు బాధపడాలి

ఇంటి బానిసలనూ సేవకులనూ తమ యజమానులకు లోబడి గౌరవంతో విధేయులుగా ఉండమని పేతురు కోరుతున్నాడు. వారు కఠినులైనా అన్యాయస్థులైనా సరే, తాము సేవించేవారి స్వభావాన్ని బట్టి తమ విధేయతను మార్చుకోకూడదు. తాము ఆయన అడుగుజాడల్లో నడవాలని తమ కోసం బాధపడిన క్రీస్తు మాదిరిని అనుసరిస్తూ, మేలు చేయడం కోసం వారు బాధలు సహించాలి. ఆయనలో పాపం లేదు (యెషయా 53:6). పాపపు అధికారం నుండి మనిషిని విడిపించడానికి ఆయన పాపానికి రావలసిన శిక్షను భరించాడు.

పేతురు రాసిన మొదటి పత్రిక 2:18–25

18 సేవకులారా, మంచివాళ్ళూ సాత్వికులయిన యజమానులకు మాత్రమే కాక వక్ర బుద్ధి గల వారికి కూడా పూర్తి మర్యాదతో లోబడి ఉండండి.

19 ఎవరయినా దేవుని గురించిన మనస్సాక్షిని బట్టి అన్యాయాన్ని అనుభవిస్తూ బాధ సహిస్తుంటే అది గొప్ప విషయం. 20 మీరు పాపం చేసి శిక్ష అనుభవిస్తూ సహిస్తుంటే అదేమి గొప్ప? మేలు చేసి బాధలకు గురి అయి సహిస్తుంటే అది దేవుని దృష్టిలో మెచ్చుకోదగినది. 21 దీనికోసమే దేవుడు మిమ్మల్ని పిలిచాడు. క్రీస్తు కూడా మీకోసం బాధపడి, మీరు తన అడుగు జాడల్లో నడవాలని మీకు ఆదర్శాన్ని ఉంచి వెళ్ళి పోయాడు.

22 ఆయన ఎలాంటి పాపం చేయలేదు.

ఆయన నోటిలో ఎలాంటి కపటమూ కనబడలేదు.

23 ఆయనను దూషించినా తిరిగి దూషించ లేదు.

ఆయన బాధపడినా తిరిగి బెదిరింపక, న్యాయంగా తీర్పు తీర్చే దేవునికి తనను తాను అప్పగించుకున్నాడు.

24 మనకు పాపాల్లో ఇక ఎలాంటి భాగమూ ఉండకుండాా నీతి కోసం బతకడానికి స్వయంగా ఆయనే తన దేహంలో మన పాపాలను మాను మీద భరించాడు. ఆయన పొందిన గాయాల వలన మీరు బాగుపడ్డారు. 25 మీరు తప్పిపోయిన గొర్రెల్లాగా తిరుగుతూ ఉన్నారు. అయితే ఇప్పుడు మీ కాపరి, మీ ఆత్మల సంరక్షకుని దగ్గరికి తిరిగి వచ్చారు.