ఫిలేమోనుకు పౌలు లేఖ రాయడం

పౌలు తన స్నేహితుడైన ఫిలేమోనుకు, అతని దాసుడైన ఒనేసిము తరఫున వేడుకోవడానికి తన లేఖ రాస్తున్నాడు. ఒనేసిము తన యజమాని సేవ నుండి పారిపోయి రోమ్ నగరానికి వెళ్ళాడు. ఆ నగరంలో పౌలు పరిచర్య ద్వారా ఒనేసిము క్రైస్తవ మతంలోకి మారాడు.

క్రీ.శ. 62

ఇండియన్ రివైజ్డ్ వెర్షన్ (IRV) - తెలుగు -2019 (IRVTEL)

ఫిలేమోనుకు పౌలు వందనాలు

ఒక వ్యక్తిగత విషయం గురించి రాస్తున్న పౌలు, అపొస్తలుని హోదాతో, అధికారంతో కాకుండా, ఒక స్నేహితునిగా ఫిలేమోనును సంబోధిస్తున్నాడు. ఫిలేమోనుకు, ప్రియమైన అప్ఫియకు, అర్ఖిప్పుకు (కొలస్సయులు 4:17), అతని ఇంట్లోని సంఘానికి వందనాలు తెలియజేయడంలో తిమోతి కూడా పాలుపంచుకుంటున్నాడు. పౌలు తన ఆశీర్వాదాన్ని తెలియజేస్తున్నాడు. యేసు క్రీస్తు పట్ల ఫిలేమోనుకున్న విశ్వాసం, క్రైస్తవ సహోదరుల పట్ల అతనికున్న ప్రేమ పెరుగుతున్నందుకు తన ప్రార్థనల్లో ఎల్లప్పుడూ దేవునికి కృతజ్ఞతలు చెల్లిస్తున్నానని అతనికి చెబుతున్నాడు. గొప్ప విశ్వాసానికి ఫలమైన అతని ఔదార్యాన్ని ఇతరులతో పంచుకోవడం ద్వారా, క్రీస్తు యేసులో అతనిలో ఉన్న ప్రతి మంచి గుణాన్ని ఇతరులు తెలుసుకునేలా అది ప్రభావవంతంగా ఉండాలని కూడా ప్రార్థిస్తున్నాడు. ఎందుకంటే అతని ప్రేమ వల్ల తమకే ఎంతో ఆనందం, ఆదరణ కలిగాయి. ముఖ్యంగా క్రీస్తు నామం కారణంగా తమ ఇళ్ళ నుండి తరిమివేయబడి, సువార్త ప్రకటిస్తూ సంచరించిన పేద పరిశుద్ధులకు ఫిలేమోను సంపద ఉపశమనం కలిగించినందుకు అలా జరిగింది.

ఫిలేమోనుకు రాసిన పత్రిక 1:1–7

1 మా ప్రియ సోదరుడు, జతపనివాడు అయిన ఫిలేమోనుకు, 2 మన సోదరి అప్ఫియకు, మన సాటి సైనికుడు అర్ఖిప్పుకు, నీ ఇంట్లో సమావేశమయ్యే సంఘానికీ క్రీస్తు యేసు ఖైదీ అయిన పౌలు, సోదరుడు తిమోతి రాస్తున్న సంగతులు. 3 మన తండ్రి అయిన దేవుని నుండీ యేసు క్రీస్తు ప్రభువు నుండీ మీకు కృప, శాంతి కలుగు గాక.

4-5 ప్రభువైన యేసు పట్ల, పరిశుద్ధులందరి పట్ల నీకున్న ప్రేమను గూర్చి, విశ్వాసం గూర్చి నేను విని, నా ప్రార్థనల్లో మీ గురించి విజ్ఞాపన చేస్తూ, ఎప్పుడూ నా దేవునికి కృతజ్ఞత చెబుతున్నాను. 6 విశ్వాసంలో నీవు పాల్గొనడం క్రీస్తులో మనకు ఉన్న ప్రతి మంచినీ నీవు అనుభవపూర్వకంగా తెలుసుకోవడం లో మరింత చురుకుగా ఉండాలని ప్రార్ధిస్తున్నాను. 7 సోదరా, పరిశుద్ధుల హృదయాలకు నీవు సేద దీర్చావు కాబట్టి నీ ప్రేమ నాకెంతో ఆనందాన్నీ ఆదరణనూ తెచ్చింది.

ఒనేసిము కోసం పౌలు వేడుకోలు

ఫిలేమోను చేసిన దయగల, ఉదారమైన ప్రయత్నాల వల్ల అతని పట్ల తనకున్న ప్రేమను బట్టి పౌలు ఇలా ప్రకటిస్తున్నాడు: తాను ప్రస్తావించబోయే విషయంలో సరైనది చేయమని క్రీస్తు అపొస్తలునిగా ఆజ్ఞాపించగలిగినా, ఫిలేమోను పట్ల తనకున్న ప్రేమను బట్టి, పరిశుద్ధుల పట్ల ఫిలేమోను చూపిన ప్రేమను బట్టి అతణ్ణి వేడుకోవడానికే ఇష్టపడుతున్నాడు. తన కుమారుడైన ఒనేసిము కోసం ఈ వేడుకోలు చేస్తున్నాడు. అతణ్ణి ఆత్మీయంగా నూతన సృష్టిగా కనిన తండ్రి పౌలే; తన ఇష్టప్రకారమే అతణ్ణి తిరిగి పంపాడు. పౌలు ఇలా వేడుకుంటున్నాడు: “కాబట్టి అతణ్ణి నీ ఇంట్లోకి చేర్చుకో. అతడు నా హృదయమే, నా కుమారుడే, నాలో ఒక భాగమే అనవచ్చు. అతడు నాకు ఎంత ఉపయోగకరంగా ఉన్నాడంటే, సువార్త కోసం సంకెళ్ళలో ఉన్న నీ ఆత్మీయ తండ్రినైన నాకు సేవ చేయడానికి, నీవు రోమ్ నగరంలో ఉండి ఉంటే చేసేదాన్ని చేయడానికి అతణ్ణి నా దగ్గరే ఉంచుకోవాలనుకున్నాను. అయితే ఈ విషయంలో నీ అభిప్రాయం తెలియకుండా అతణ్ణి ఉంచుకోవడానికి ఇష్టపడలేదు. ఎందుకంటే అతణ్ణి క్షమించడం ద్వారా నీవు నాకు చూపే దయ బలవంతం వల్ల కాకుండా నీ స్వచ్ఛందమైన సదుద్దేశం నుండి రావాలని కోరుకున్నాను. దేవుని ఏర్పాటు ద్వారా అతడు నీకు శాశ్వతంగా తిరిగి లభించడానికే కొంతకాలం దూరమయ్యాడు. ఇక దాసునిగా కాకుండా, ప్రభువులో ప్రియమైన సహోదరునిగా లభించాడు. అతడు నాకు ఎంతో ప్రియమైనవాడు; అయితే నీ ఆస్తిగా, నీ ఇంట్లో ఒకడిగా, ఇప్పుడు నీ పరలోక కుటుంబమైన నీ ఇంట్లోని సంఘంలో సభ్యునిగా అయిన అతడు నీకు మరెంత ప్రియమైనవాడో! నీ ప్రేమలో నన్ను భాగస్వామిగా భావిస్తే, నన్ను స్వీకరించినట్లే అతణ్ణి స్వీకరించు. ఎందుకంటే అతడు నాలో ఒక భాగమే అనవచ్చు; అతణ్ణి స్వీకరించడంలో నన్ను స్వీకరిస్తావు. అతడు నీకు ఏదైనా అన్యాయం చేసి ఉంటే, లేక ఏమైనా బాకీ ఉంటే, అదంతా నా లెక్కలో వేయి. అతడు నీకు బాకీ ఉన్నదంతా నేను చెల్లిస్తాను; నీకు తిరిగి చెల్లిస్తానని నా స్వహస్తాలతో వాగ్దానం చేస్తున్నాను. ఎందుకంటే నీవు నాకు ఎంతో ఋణపడి ఉన్నావనే కారణంతో ఈ ఉపకారం చేయడం నాకు ఇష్టం లేదు; నిజానికి నీ సొంత జీవితానికే, క్రైస్తవునిగా నీ జీవితానికి నీవు నాకు ఋణపడి ఉన్నావు. కాబట్టి ప్రభువులో నీ వల్ల నాకు కొంత ప్రయోజనం కలగనివ్వు. ఈ విషయంలో నా ఆత్మకున్న గాఢమైన కోరికను తీర్చి, అతణ్ణి తిరిగి నీ ఇంట్లోకి చేర్చుకో. నీ క్రైస్తవ సద్గుణాల గురించి నాకు తెలిసినదాన్ని బట్టి, నీవు విధేయత చూపుతావనే నమ్మకంతో నీకు రాశాను. నేను అడిగినదానికంటే మరెక్కువ చేస్తావని నాకు పూర్తి నమ్మకం ఉంది.” వారి పరిచారకుడైన ఎపఫ్రా వందనాలను, తనతో ఉన్న ఇతరుల వందనాలను తెలియజేసి, ఫిలేమోనుకు, అతని ఇంట్లోని సంఘానికి తన ఆశీర్వాదంతో ముగిస్తున్నాడు.

ఫిలేమోనుకు రాసిన పత్రిక 1:8–25

8 అందుచేత తప్పకుండా చేయవలసి ఉన్న వాటిని గురించి నీకు ఆజ్ఞాపించే ధైర్యం క్రీస్తులో నాకున్నప్పటికీ, 9 ముసలివాడినీ ఇప్పుడు క్రీస్తు యేసు కోసం ఖైదీగా ఉన్న పౌలు అనే నేను ప్రేమను బట్టే నిన్ను వేడుకుంటున్నాను. 10 నేను నా బిడ్డ ఒనేసిము గురించి నిన్ను అడుగుతున్నాను. నేను చెరలో ఉన్నపుడు అతడు నాకు కొడుకయ్యాడు. 11 గతంలో అతడి వలన నీకు ప్రయోజనం ఏమీ లేకపోయింది. ఇప్పుడయితే అతడు నీకూ నాకూ ప్రయోజనకారి అయ్యాడు. 12 నా ప్రాణంతో సమానమైన అతణ్ణి నీ దగ్గరికి తిరిగి పంపుతున్నాను. 13 నేను సువార్త కోసం సంకెళ్ళలో ఉంటే నీ పక్షాన నాకు సాయం చేయడానికి నా దగ్గరే అతణ్ణి ఉంచుకోవాలనుకున్నాను 14 అయితే నీ అనుమతి లేకుండా అలాటిది ఏదయినా చేయడం నాకిష్టం లేదు. నీ మంచితనాన్ని బలవంతంగా కాక నీకు ఇష్టపూర్వకంగా ఉపయోగించుకోవాలని నా అభిప్రాయం. 15 బహుశా అతడు ఎప్పుడూ నీ దగ్గరే ఉండడానికి కొంతకాలం నీకు దూరమయ్యాడు కాబోలు. 16 ముఖ్యంగా నాకూ, శరీర బంధాన్ని బట్టీ ప్రభువును బట్టీ మరి ముఖ్యంగా నీకూ అతడు ఇక ఎంత మాత్రం బానిసగా మాత్రమే కాక అంతకంటే ఎక్కువగా ప్రియమైన సోదరుడు. 17 అందుచేత నీవు నన్ను నీ జత పనివానిగా ఎంచితే నన్ను చేర్చుకున్నట్టే అతణ్ణి కూడా చేర్చుకో. 18 ఒకవేళ అతడు నీపట్ల ఏదైనా అపరాధం చేసి ఉంటే, లేకపోతే నీకు బాకీ ఉంటే దాన్ని నా లెక్కలో వెయ్యి. 19 పౌలు అనే నేను నా స్వదస్తూరీతో ఈ మాట రాస్తున్నాను. ఆ బాకీ నేనే తీరుస్తాను. అయినా అసలు నీ జీవం విషయంలో నువ్వే నాకు బాకీ పడి ఉన్నావని నేను ప్రస్తావించడం లేదు. 20 ఔను, సోదరా, ప్రభువులో నాకు సంతోషం కలిగించు. క్రీస్తులో నా హృదయానికి సేద తీర్చు. 21 నీవు నా మాట వింటావని నమ్మకంతో రాస్తున్నాను. నేను చెప్పినదాని కంటే నీవు ఎక్కువ చేస్తావని కూడా నాకు తెలుసు.

22 సరే. నా కోసం వసతి సిద్ధం చెయ్యి. ఎందుకంటే మీ ప్రార్థనల ద్వారా దేవుడు నన్ను మీ దగ్గరికి పంపుతాడనే ఆశాభావంతో ఉన్నాను. 23 క్రీస్తు యేసు కోసం నా సాటి ఖైదీ ఎపఫ్రా, 24 అలానే నా జత పనివారు మార్కు, అరిస్తార్కు, దేమా, లూకా నీకు అభివందనాలు చెబుతున్నారు.

25 మన ప్రభు యేసు క్రీస్తు కృప మీ ఆత్మకు తోడై ఉండు గాక. ఆమెన్.