மூன்று தூதர்கள் மனிதகுலத்திற்கு வேண்டுகோள் விடுக்கிறார்கள்
சிறிய சுருளின் ஐந்தாம் பகுதி, 1260 ஆண்டுகளின்போது தேவனுடைய ஆவிக்குரிய திருச்சபை ஒடுக்கப்பட்டிருந்த நிலையைச் சித்தரிக்கிறது. மனிதகுலத்திற்கு வேண்டுகோள் விடுக்கும் மூன்று தூதர்களின் உருவகத்தின்கீழ், லூத்தரின் சீர்திருத்தத்தையும், மனிதகுலத்திற்கு அறிவொளி அளிக்க இங்கிலாந்து தற்போது மேற்கொள்ளும் முயற்சிகளையும், எதிர்காலத்தில் போப்பாண்டவர் ஆட்சிக்கு எதிராக இன்னும் அதிக வெற்றிபெறும் எதிர்ப்பையும் இது முன்னறிவிப்பதாக இருப்பதற்கே அதிக வாய்ப்புள்ளது.
கி.பி. 96
இண்டியன் ரிவைஸ்டு வெர்ஸன் (IRV) - தமிழ் (IRVTAM)
வெளிப்படுத்தின விசேஷம் 14:1–13
1 பின்பு நான் பார்த்தபோது, இதோ, சீயோன் மலையின்மேல் ஆட்டுக்குட்டியானவரையும், அவரோடு அவருடைய பிதாவின் பெயர் தங்களுடைய நெற்றிகளில் எழுதப்பட்டிருந்த ஒருஇலட்சத்து நாற்பத்து நான்காயிரம்பேரும் நிற்பதைப் பார்த்தேன். 2 அல்லாமலும், பெருவெள்ளத்தின் இரைச்சல்போலவும். பலத்த இடிமுழக்கம்போலவும், ஒரு சத்தம் வானத்திலிருந்து உண்டாகக் கேட்டேன்; நான் கேட்ட சத்தம் சுரமண்டலக்காரர்கள் தங்களுடைய சுரமண்டலங்களை வாசிக்கிற ஓசையைப்போல இருந்தது. 3 அவர்கள் சிங்காசனத்திற்கு முன்பாகவும், நான்கு ஜீவன்களுக்கு முன்பாகவும், மூப்பர்களுக்கு முன்பாகவும் புதுப்பாட்டைப் பாடினார்கள்; அந்தப் பாட்டு பூமியிலிருந்து மீட்டுக்கொள்ளப்பட்ட ஒருஇலட்சத்து நாற்பத்து நான்காயிரம் நபர்களைத்தவிர வேறொருவரும் கற்றுக்கொள்ளமுடியாமல் இருந்தது. 4 பெண்களால் தங்களைக் கறைப்படுத்தாதவர்கள் இவர்களே; கற்புள்ளவர்கள் இவர்களே; ஆட்டுக்குட்டியானவர் எங்கே சென்றாலும் அவரைப் பின்பற்றுகிறவர்கள் இவர்களே; இவர்கள் மனிதர்களில் இருந்து தேவனுக்கும் ஆட்டுக்குட்டியானவருக்கும் முதற்பலனாக மீட்டுக்கொள்ளப்பட்டவர்கள். 5 இவர்களுடைய வாயிலே கபடம் காணப்படவில்லை; இவர்கள் தேவனுடைய சிங்காசனத்திற்கு முன்பாக குற்றமில்லாதவர்களாக இருக்கிறார்கள்.
6 பின்பு வேறொரு தூதன் வானத்தின் நடுவிலே பறப்பதைப் பார்த்தேன்; அவன் பூமியில் வசிக்கின்ற எல்லா தேசத்தார்களுக்கும், கோத்திரத்தார்களுக்கும், மொழிக்காரர்களுக்கும், மக்கள்கூட்டத்தினருக்கும் அறிவிக்கும் நித்திய நற்செய்தியை உடையவனாக இருந்து, 7 அதிக சத்தமிட்டு: தேவனுக்குப் பயந்து, அவரை மகிமைப்படுத்துங்கள்; அவர் நியாயத்தீர்ப்பு கொடுக்கும் நேரம் வந்துவிட்டது; வானத்தையும் பூமியையும் கடலையும் நீரூற்றுகளையும் உண்டாக்கினவரைத் தொழுதுகொள்ளுங்கள் என்று சொன்னான். 8 வேறொரு தூதன் பின்னேசென்று: பாபிலோன் மகா நகரம் விழுந்தது! விழுந்தது! தன் வேசித்தனமாகிய கோபமான மதுவை எல்லா தேசத்து மக்களுக்கும் குடிக்கக் கொடுத்தாளே! என்றான். 9 அவர்களுக்குப் பின்னால் மூன்றாம் தூதன் வந்து, அதிக சத்தமிட்டு: மிருகத்தையும் அதின் உருவத்தையும் வணங்கித் தன் நெற்றியிலோ தன் கையிலோ அதின் முத்திரையை அணிந்து கொள்ளுகிறவன் எவனோ, 10 அவன் தேவனுடைய கோபத்தின் தண்டனையாகிய பாத்திரத்திலே கலப்பில்லாமல் ஊற்றப்பட்ட அவருடைய கோபமாகிய மதுவைக் குடித்து, பரிசுத்த தூதர்களுக்கு முன்பாகவும், ஆட்டுக்குட்டியானவருக்கு முன்பாகவும், அக்கினியினாலும் கந்தகத்தினாலும் வாதிக்கப்படுவான். 11 அவர்களுடைய வாதையின் புகை எல்லாக் காலங்களிலும் எழும்பும்; மிருகத்தையும் அதின் உருவத்தையும் வணங்குகிறவர்களுக்கும், அதினுடைய பெயரின் முத்திரையை அணிந்துகொள்ளுகிற அனைவருக்கும் இரவும் பகலும் ஓய்வு இருக்காது. 12 தேவனுடைய கட்டளைகளையும் இயேசுவின்மேலுள்ள விசுவாசத்தையும் காத்துக்கொள்ளுகிறவர்களாகிய பரிசுத்தவான்களுடைய பொறுமை இதிலே வெளிப்படும் என்று சொன்னான். 13 பின்பு, பரலோகத்திலிருந்து ஒரு சத்தம் உண்டாகக் கேட்டேன்; அது: கர்த்தருக்குள் மரிக்கிறவர்கள் இதுமுதல் பாக்கியவான்கள் என்று எழுது; அவர்கள் தங்களுடைய வேலைகளில் இருந்து ஒய்வெடுப்பார்கள்; அவர்களுடைய செய்கைகள் அவர்களோடு கூடப்போகும்; ஆவியானவரும் ஆம் என்று சொல்லியிருக்கிறார் என்று சொல்லியது.
தேவனுடைய கோபத்தின் அறுவடையும் திராட்சை அறுவடையும்
சிறிய சுருளின் உள்ளடக்கத்தைக் கூறியபின், தீர்க்கதரிசி மூன்றாம் ஆபத்து எக்காளத்தின் முழக்கத்தை விவரிக்கத் தொடர்கிறார். அப்போது ஏழு கலசங்கள் ஊற்றப்பட வேண்டும், அல்லது ஏழு இடிமுழக்கங்கள் முழங்க வேண்டும். சிறிய சுருளின் தீர்க்கதரிசனங்களை வெளிப்படுத்தும்வரை அவற்றை எழுதக்கூடாது என்று தூதன் யோவானுக்குத் தடை விதித்திருந்தான் (வெளிப்படுத்தின விசேஷம் 10:4). ஏழாம் தூதனுடைய சத்தத்தின் நாட்களில் தேவனுடைய இரகசியம் நிறைவேறும் என்று அறிவிக்கப்பட்டிருந்தது (வெளிப்படுத்தின விசேஷம் 10:7). 1260 ஆண்டுகளின் முடிவில் கிறிஸ்துவின் ராஜ்யம் நிலைநாட்டப்படுவதற்கு முன் நிகழவிருக்கும் பயங்கர நிகழ்வுகள், தேவனுடைய கோபத்தின் திராட்சை அறுவடை மற்றும் அறுவடை ஆகிய அடையாளங்களின்கீழ் கூறப்படுகின்றன. அவருடைய நியாயத்தீர்ப்புகள் நிறைவடைந்தபின் தேவனுடைய திருச்சபை பெறும் வெற்றி முன்கூட்டியே எதிர்நோக்கப்படுகிறது.
வெளிப்படுத்தின விசேஷம் 14:14–15:4
14 பின்பு நான் பார்த்தபோது, இதோ, வெண்மையான மேகத்தையும், அந்த மேகத்தின்மேல் மனிதகுமாரனைப்போல தமது தலையின்மேல் பொற்கிரீடத்தையும் தமது கையிலே கூர்மையான அரிவாளையும் வைத்திருக்கும் ஒருவர் உட்கார்ந்திருப்பதையும் பார்த்தேன். 15 அப்பொழுது வேறொரு தூதன் தேவாலயத்திலிருந்து புறப்பட்டு, மேகத்தின்மேல் உட்கார்ந்திருக்கிறவரைப் பார்த்து: பூமியின் பயிர் முதிர்ந்தது, அறுக்கிறதற்குக் காலம் வந்தது, எனவே உம்முடைய அரிவாளை நீட்டி அறுத்துவிடும் என்று அதிக சத்தமிட்டுச் சொன்னான். 16 அப்பொழுது மேகத்தின்மேல் உட்கார்ந்திருந்தவர் தமது அரிவாளைப் பூமியின்மேல் நீட்டினார், பூமியின் விளைச்சல் அறுக்கப்பட்டது. 17 பின்பு வேறொரு தூதனும் கூர்மையான அரிவாளைப் பிடித்துக்கொண்டு பரலோகத்திலுள்ள தேவாலயத்திலிருந்து புறப்பட்டுவந்தான். 18 அக்கினியின்மேல் அதிகாரம் உள்ள வேறொரு தூதனும் பலிபீடத்திலிருந்து புறப்பட்டுவந்து, கூர்மையான அரிவாளைப் பிடித்திருக்கிறவனைப் பார்த்து: பூமியின் திராட்சைப்பழங்கள் பழுத்திருக்கிறது, கூர்மையான உமது அரிவாளை நீட்டி, அதின் குலைகளை அறுத்துவிடும் என்று அதிக சத்தத்தோடு சொன்னான். 19 அப்பொழுது அந்தத் தூதன் தன் அரிவாளைப் பூமியின்மேலே நீட்டி, பூமியின் திராட்சைப்பழங்களை அறுத்து, தேவனுடைய கோபத்தின் தண்டனை என்னும் பெரிய ஆலையிலே போட்டான்; 20 நகரத்திற்கு வெளியே உள்ள அந்த ஆலையிலே அது மிதிக்கப்பட்டது; அந்த ஆலையிலிருந்து முந்நூறு கிலோமீட்டர் தூரத்திற்கு இரத்தம் புறப்பட்டு குதிரைகளின் கடிவாளங்களின் உயரம்வரைக்கும் பெருகிவந்தது.
15:1 பின்பு, வானத்திலே பெரிதும் ஆச்சரியமுமான வேறொரு அடையாளமாகிய கடைசியான ஏழு வாதைகளையுடைய ஏழு தூதர்களைப் பார்த்தேன், அவைகளால் தேவனுடைய கோபம் முடிவிற்கு வந்தது. 2 அன்றியும், அக்கினிக் கலந்த கண்ணாடிக் கடல்போல ஒரு கடலையும், மிருகத்திற்கும் அதின் உருவத்திற்கும் அதின் முத்திரைக்கும் அதின் பெயரின் எண்ணிற்கும் உள்ளாகாமல் ஜெயம் பெற்றவர்கள் தேவ சுரமண்டலங்களைப் பிடித்துக்கொண்டு அந்தக் கண்ணாடிக் கடலருகே நிற்கிறதையும் பார்த்தேன். 3 அவர்கள் தேவனுடைய ஊழியக்காரனாகிய மோசேயின் பாட்டையும் ஆட்டுக்குட்டியானவருடைய பாட்டையும் பாடி:
“சர்வவல்லமையுள்ள தேவனாகிய கர்த்தாவே,
தேவரீருடைய செய்கைகள் மகத்துவமும் ஆச்சரியமுமானவைகள்;
பரிசுத்தவான்களின் ராஜாவே, தேவரீருடைய வழிகள் நீதியும் சத்தியமுமானவைகள்.
4 கர்த்தாவே, யார் உமக்குப் பயப்படாமலும்,
உமது நாமத்தை மகிமைப்படுத்தாமலும் இருப்பார்கள்?
தேவரீர் ஒருவரே பரிசுத்தர்,
எல்லா தேசத்து மக்களும் வந்து உமக்கு முன்பாகத் தொழுதுகொள்வார்கள்;
உம்முடைய நீதியான செயல்கள் வெளிப்பட்டது” என்றார்கள்.
ஏழு தூதர்கள் கோபத்தின் கலசங்களை ஆயத்தப்படுத்துகிறார்கள்
ஏழாம் ஆபத்து எக்காளம் இப்போது முழங்குகிறது. 1260 ஆண்டுகளைப் பற்றிய தரிசனத்தின் முதல் பகுதியில், முஸ்லிம் வல்லமைகளின் முன்னேற்றம் நிறைவடைந்ததும் அது முழங்குவதாக விவரிக்கப்பட்டது (அந்த முன்னேற்றம் இறுதியாக 1698 இல் முடிவடைந்தது; வெளிப்படுத்தின விசேஷம் 11:15–18). அந்த மதம் வீழ்த்தப்படும் காலம் வரையிலான கிழக்குப் பேரரசின் தீர்க்கதரிசன வரலாற்றை அது முடிவுக்குக் கொண்டுவந்தது. கிறிஸ்தவம் உலகளாவியதாகும் நாள் தொடங்குவதற்கு முன், பூமியையும் முஸ்லிம், போப்பாண்டவர் சார்ந்த மற்றும் அவிசுவாச வல்லமைகளையும் தண்டிப்பதற்காக ஏழு தூதர்கள் தேவனுடைய கோபத்தின் கலசங்களை ஆயத்தப்படுத்துவதாகச் சித்தரிக்கப்படுகிறார்கள் (1698 முதல் 1860 வரை).
வெளிப்படுத்தின விசேஷம் 15:5–16:1
5 இவைகளுக்குப் பின்பு, நான் பார்த்தபோது, இதோ, பரலோகத்திலே சாட்சியின் கூடாரமாகிய தேவனுடைய ஆலயம் திறக்கப்பட்டது; 6 அந்த ஆலயத்திலிருந்து ஏழு வாதைகளையுடைய அந்த ஏழு தூதர்களும் பரிசுத்தமும் பிரகாசமுமான மெல்லிய ஆடையணிந்து, மார்பில் பொற்கச்சைகளைக் கட்டிக்கொண்டு புறப்பட்டார்கள். 7 அப்பொழுது அந்த நான்கு ஜீவன்களில் ஒன்று, எல்லாக் காலங்களிலும் உயிரோடு இருக்கிற தேவனுடைய கோபாத்தினால் நிறைந்த ஏழு பொற்கலசங்களை அந்த ஏழு தூதர்களுக்குக் கொடுத்தது. 8 அப்பொழுது, தேவனுடைய மகிமையினாலும் அவருடைய வல்லமையினாலும் உண்டான புகையினாலே தேவனுடைய ஆலயம் நிறைந்தது; ஏழு தூதர்களுடைய ஏழு வாதைகளும் முடியும்வரைக்கும் ஒருவரும் தேவாலயத்திற்குள் செல்லமுடியவில்லை.
16:1 அப்பொழுது தேவாலயத்திலிருந்து வந்த ஒரு பெரியசத்தம் அந்த ஏழு தூதர்களிடம்: நீங்கள் போய் ஏழு கலசங்களிலும் உள்ள தேவனுடைய கோபத்தை பூமியின்மேல் ஊற்றுங்கள் என்று சொல்வதைக்கேட்டேன்.
முதலாம் கலசம்: பிரெஞ்சுப் புரட்சி
முதலாம் கலசம் ஊற்றப்படுகிறது; தேவனுடைய கோபத்தின் அறுவடை தொடங்குகிறது. இஸ்லாமின் முன்னேற்றம் முடிவடைவதற்கும் 1260 ஆண்டுகளின் முடிவு வருவதற்கும் இடையில் கடுமையான ஒரு பேரழிவு நிகழும் என்று முன்னறிவிக்கப்படுகிறது. இந்தக் கலசம் ஊற்றப்படுவது பிரெஞ்சுப் புரட்சியை முன்னறிவிப்பதாக நாங்கள் கருதுகிறோம். போப்பாண்டவரின் மதத்தைப் பின்பற்றுவோருக்கு இதுவரை நேரிட்ட பேரழிவுகளிலேயே மிகவும் பயங்கரமானது அது; அதன் விளைவுகள் நாகரிக உலகம் முழுவதையும் இன்னும் நிலைகுலையச் செய்கின்றன. போப்பாண்டவர் ஆட்சியை வாட்டுவதாக முன்னறிவிக்கப்பட்ட புண், அவிசுவாசமாக இருக்கலாம் (1789–1791).
2 முதலாம் தூதன் போய், தன் கலசத்தில் இருந்ததை பூமியின்மேல் ஊற்றினான்; உடனே மிருகத்தின் முத்திரையை அணிந்தவர்களும் அதின் உருவத்தை வணங்குகிற மனிதர்களுக்குப் பொல்லாத கொடிய புண்கள் உண்டானது.
இரண்டாம் கலசம்: கடல் இரத்தமாகிறது
இரண்டாம் கலசம் ஊற்றப்படுகிறது; கடல் இரத்தமாகிறது. அப்போது உலகை வாட்டிய இரத்தக்களரியான போர்களையும் படுகொலைகளையும் இந்த உருவகம் விவரிக்கலாம் (1791–1794).
3 இரண்டாம் தூதன் தன் கலசத்தில் உள்ளதைக் கடலிலே ஊற்றினான்; உடனே அது மரித்தவனுடைய இரத்தத்தைப்போலானது; கடலிலுள்ள பிராணிகளெல்லாம் மரித்துப்போயின.
மூன்றாம் கலசம்: நதிகள் இரத்தமாகின்றன
மூன்றாம் கலசம் ஊற்றப்படுகிறது; நதிகளும் நீரூற்றுகளும் இரத்தமாகின்றன. அவிசுவாசத்தால் அறிவின் ஊற்றுகள் மாசுபடுவதையும், புரட்சிப் போர்களின்போது ஐரோப்பாவின் சிறிய அரசுகள் பேரழிவுக்கு உள்ளாவதையும் இந்த அடையாளங்கள் குறிக்கலாம் (1794–1801).
4 மூன்றாம் தூதன் தன் கலசத்திலுள்ளதை ஆறுகளிலும், நீரூற்றுகளிலும் ஊற்றினான்; உடனே அவைகள் இரத்தமாக மாறியது. 5 அப்பொழுது தண்ணீர்களின் தூதன்:
இருக்கிறவரும் இருந்தவரும் பரிசுத்தருமாகிய தேவரீர்
இப்படி நியாயந்தீர்க்க நீதியுள்ளவராக இருக்கிறீர்.
6 அவர்கள் பரிசுத்தவான்களுடைய இரத்தத்தையும்
தீர்க்கதரிசிகளுடைய இரத்தத்தையும் சிந்தினதினால்,
இரத்தத்தையே அவர்களுக்குக் குடிக்கக்கொடுத்தீர்;
அதற்குத் தகுதியுடையவர்களாக இருக்கிறார்கள்” என்று சொல்வதைக்கேட்டேன். 7 பலிபீடத்திலிருந்து வேறொருவன்:
ஆம், சர்வவல்லமையுள்ள தேவனாகிய கர்த்தாவே,
உம்முடைய நியாயத்தீர்ப்புகள்
சத்தியமும் நீதியுமானவைகள்” என்று சொல்வதைக்கேட்டேன்.
நான்காம் கலசம்: ஒருவேளை நெப்போலியனின் பேரரசு
நான்காம் கலசம் ஊற்றப்படுகிறது. சூரியனின் வெப்பத்தால் உலகம் சுட்டெரிக்கப்படுவதாகச் சித்தரிக்கப்படுகிறது. சூரியன் இறையாண்மையைக் குறிக்கும் நன்கறியப்பட்ட அடையாளமாக இருப்பதால், நெப்போலியனின் பேரரசு இங்கு குறிக்கப்படலாம் (1801–1814).
8 நான்காம் தூதன் தன் கலசத்தில் உள்ளதைச் சூரியன்மேல் ஊற்றினான்; தீயினால் மனிதர்களைச் சுடுவதற்கு அதற்கு அதிகாரம் கொடுக்கப்பட்டது. 9 அப்பொழுது மனிதர்கள் அதிக வெப்பத்தினால் சுடப்பட்டு, இந்த வாதைகளைச் செய்ய அதிகாரமுள்ள தேவனுடைய நாமத்தை அவமதித்தார்களேதவிர, அவரை மகிமைப்படுத்த மனம்திரும்பவில்லை.
ஐந்தாம் கலசம்: வேதனையில் போப்பாண்டவர் ஆட்சியைப் பின்பற்றுவோர்
ஐந்தாம் கலசம் ஊற்றப்படுகிறது. போப்பாண்டவர் ஆட்சியைப் பின்பற்றுவோர் துயரத்திலும் கடும் வேதனையிலும் இருப்பதாகச் சித்தரிக்கப்படுகிறார்கள். நாம் இப்போது இந்தக் கலசத்தின் கீழ் வாழ்கிறோம். வளர்ந்துவருவதும் தடுக்கமுடியாததுமான அறிவின் முன்னேற்றத்தின்மீது போப்பாண்டவரின் ரோமாபுரி கொண்டுள்ள வெறுப்பை இந்த அடையாளம் குறிக்கலாம். அந்த அறிவு, சீர்திருத்தத்தையும் மனந்திரும்புதலையும் ஏற்படுத்தாமலேயே, போப்பாண்டவரின் மதத்திலுள்ள அபத்தங்களையும் தவறுகளையும் வெளிச்சத்திற்குக் கொண்டுவருகிறது.
வெளிப்படுத்தின விசேஷம் 16:10–11
10 ஐந்தாம் தூதன் தன் கலசத்திலுள்ளதை மிருகத்தினுடைய சிங்காசனத்தின்மேல் ஊற்றினான்; அப்பொழுது அதின் ராஜ்யம் இருளடைந்தது; அவர்கள் வருத்தத்தினாலே தங்களுடைய நாக்குகளைக் கடித்துக்கொண்டு, 11 தங்களுடைய வருத்தங்களாலும், தங்களுடைய புண்களாலும், பரலோகத்தின் தேவனை அவமதித்தார்களேதவிர, தங்களுடைய செய்கைகளைவிட்டு மனம்திரும்பவில்லை.
ஆறாம் கலசம்: துருக்கியப் பேரரசு நலிவடைகிறது
ஆறாவது கலசம் ஊற்றப்படுகிறது. இந்நேரத்தில் 1260 ஆண்டுகளின் முடிவு நெருங்குகிறது. இந்தக் கலசத்தின்கீழ் வரும் அடையாளங்கள், இன்னும் படிப்படியாகவே நிகழ்ந்தாலும் நெருங்கிவரும் துருக்கியப் பேரரசின் வீழ்ச்சியையும், யூதர்கள் மீண்டும் நிலைநாட்டப்படுவதற்கான ஆயத்தத்தையும், தீய கொள்கைகள் அல்லது பொய் மதங்களின் செல்வாக்கின்கீழ் பாலஸ்தீனத்திலுள்ள கிறிஸ்துவின் சபைக்கு எதிராகக் கிறிஸ்துவுக்கு விரோதமான வல்லமைகள் அமைக்கும் பெரும் கூட்டணியின் தொடக்கத்தையும் சித்தரிக்கின்றன.
வெளிப்படுத்தின விசேஷம் 16:12–16
12 ஆறாம் தூதன் தன் கலசத்தில் உள்ளதை ஐபிராத்து என்னும் பெரிய நதியில் ஊற்றினான்; அப்பொழுது சூரியன் உதிக்கும் திசையிலிருந்து வரும் ராஜாக்களுக்கு வழி ஆயத்தமாகும்படி அந்த நதியின் தண்ணீர் வற்றிப்போனது. 13 அப்பொழுது, இராட்சசப் பாம்பின் வாயிலும் மிருகத்தின் வாயிலும் கள்ளத்தீர்க்கதரிசியின் வாயிலும் இருந்து தவளைகளைப்போல மூன்று அசுத்தஆவிகள் புறப்பட்டு வருவதைப் பார்த்தேன். 14 அவைகள் அற்புதங்களைச் செய்கிற பிசாசுகளின் ஆவிகள்; அவைகள் பூலோகமெங்கும் உள்ள ராஜாக்களை சர்வவல்லமையுள்ள தேவனுடைய மகாநாளில் நடக்கும் யுத்தத்திற்குக் கூட்டிச்சேர்க்கும்படி புறப்பட்டுப்போகிறது. 15 இதோ, திருடனைப்போல வருகிறேன். தன் மானம் தெரியும்படி நிர்வாணமாக நடக்காமல் விழித்துக்கொண்டு, தன் உடைகளைக் காத்துக்கொள்ளுகிறவன் பாக்கியவான். 16 அப்பொழுது எபிரெய மொழியிலே அர்மகெதோன் என்னப்பட்ட இடத்திலே அவர்களைக் கூட்டிச் சேர்த்தன.