பவுல் எபேசியருக்கு எழுதுகிறார்

எபேசியரைக் கிறிஸ்தவ விசுவாசத்தில் நிலைநிறுத்துவதற்காகப் பவுல் அவர்களுக்குத் தமது கடிதத்தை எழுதுகிறார். யூதரல்லாதவர்களை மோசேயின் நியாயப்பிரமாணத்திற்குக் கீழ்ப்படுத்தாமல், கிறிஸ்துவின்மீதுள்ள விசுவாசத்தின் வழியாக அவர்களை அழைத்ததில் வெளிப்பட்ட தேவனுடைய இரக்கத்தை மிகவும் உள்ளத்தை உருக்கும் மொழியில் விவரிக்கிறார். மேலும், இரட்சிப்பின் அறிவைப் பெற்ற அனைவரிடமும் தேவைப்படும் பரிசுத்தத்தையும் அதற்கேற்ற நிலையான நடத்தையையும் அவர்களிடம் வலியுறுத்துகிறார்.

கி.பி. 61

இண்டியன் ரிவைஸ்டு வெர்ஸன் (IRV) - தமிழ் (IRVTAM)

பவுல் எபேசியரை வாழ்த்துகிறார்

குறிப்பானதும் பொதுவானதுமான தமது வாழ்த்துக்குப் பின், யூதரல்லாதவர்களுக்குத் தேவன் அளித்த ஆவிக்குரிய ஆசீர்வாதங்களுக்காகவும், தமது இரக்கமுள்ள நோக்கத்தின்படி அவர்களைப் பரிசுத்தரும் குற்றமற்றவர்களுமான தமது தேர்ந்தெடுக்கப்பட்ட மக்களாக அழைத்ததற்காகவும் பவுல் மகிழ்ச்சியுடன் தேவனுக்கு நன்றி செலுத்துகிறார். இயேசு கிறிஸ்துவின்மீதுள்ள விசுவாசத்தின் வழியாக அவருடைய பிள்ளைகளாகத் தத்தெடுக்கப்படுவதற்கு அவர்கள் முன்குறிக்கப்பட்டிருந்தார்கள். அவருடைய இரத்தத்தால் அவர்கள் மீட்கப்பட்டு, அவர்களுடைய பாவங்கள் மன்னிக்கப்படுகின்றன; மோசேயின் நியாயப்பிரமாணத்தால் அல்ல, அவருடைய மிகுதியான இரக்கத்தினாலேயே இவை நிகழ்கின்றன. ஆவிக்குரிய காரியங்களில் ஞானத்தையும் அதை நடைமுறையில் பயன்படுத்துவதில் விவேகத்தையும் அவர் அப்போஸ்தலர்களுக்கு அளித்தார். தமது சித்தத்தின் இரகசியத்தையும் (யூதரல்லாதவர்களை யூத நியாயப்பிரமாணத்திற்குக் கீழ்ப்படுத்தாமல் தமது சபையில் சேர்த்துக்கொள்வதையும்), யூதர்களும் யூதரல்லாதவர்களும் இயேசு கிறிஸ்துவின் கீழ் ஒரே சபையாக ஒன்றுசேர்க்கப்படும் திட்டத்தையும் அவர்களுக்கு வெளிப்படுத்தினார். ஆபிரகாமின் ஆவிக்குரிய பிள்ளைகளுக்கு வாக்குத்தத்தம் செய்யப்பட்ட ஆவிக்குரிய சுதந்தரத்தை விசுவாசிக்கும் யூதர்கள் கிறிஸ்துவின் வழியாகப் பெற்றிருக்கிறார்கள். கிறிஸ்துவின்மீதுள்ள விசுவாசத்தின் வழியாக, அவருடைய சொந்த சித்தத்தின் நோக்கத்தின்படி அவர்கள் முன்குறிக்கப்பட்டார்கள், அல்லது மீண்டும் தேர்ந்தெடுக்கப்பட்டார்கள். கிறிஸ்துவை முதலில் விசுவாசித்த அவர்கள், இரட்சிப்பின் அறிவை உலகத்திற்குக் கொண்டுசெல்வதன் மூலம் அவருடைய மகிமைக்குப் புகழ்ச்சியாக இருக்க வேண்டியிருந்தது. அப்போஸ்தலர்களிடமிருந்து சத்திய வசனத்தைக் கேட்டபோது யூதரல்லாதவர்களும் அவரில் விசுவாசித்தார்கள். மேலும், கிறிஸ்துவின் புகழ்ச்சிக்கும் மகிமைக்கும் ஏதுவாக, யூதர்களும் இப்போது யூதரல்லாதவர்களும் ஒன்றாக விலைகொடுத்து வாங்கப்பட்ட பரலோக உடைமையை அடையும்வரை, அவர்களுடைய நித்திய சுதந்தரத்திற்கு உறுதிப்பணமாகப் பிதாவினால் வாக்குத்தத்தம் செய்யப்பட்ட பரிசுத்த ஆவியானவர் அவர் வழியாக அளிக்கப்பட்டார்.

எபேசியர் 1:1–14

1 தேவனுடைய விருப்பத்தினாலே இயேசுகிறிஸ்துவினுடைய அப்போஸ்தலனாகிய பவுல், எபேசுவிலே கிறிஸ்து இயேசுவிற்குள் விசுவாசிகளாக இருக்கிற பரிசுத்தவான்களுக்கு எழுதுகிறதாவது: 2 நம்முடைய பிதாவாகிய தேவனாலும், கர்த்தராகிய இயேசுகிறிஸ்துவினாலும், உங்களுக்குக் கிருபையும், சமாதானமும் உண்டாவதாக.

3 நம்முடைய கர்த்தராகிய இயேசுகிறிஸ்துவின் பிதாவாகிய தேவனுக்கு ஸ்தோத்திரம்; அவர் கிறிஸ்துவிற்குள் உன்னதங்களிலே ஆவியானவருக்குரிய எல்லா ஆசீர்வாதங்களினாலும் நம்மை ஆசீர்வதித்திருக்கிறார். 4 அவருக்கு முன்பாக நாம் எல்லோரும் பரிசுத்தம் உள்ளவர்களும், குற்றம் இல்லாதவர்களுமாக இருப்பதற்கு, உலகம் உருவாக்கப்படுவதற்கு முன்பே கிறிஸ்துவிற்குள் அவர் நம்மைத் தெரிந்துகொண்டபடியே, 5 பிரியமானவருக்குள் அவர் நமக்கு அருளிய அவருடைய கிருபையின் மகிமைக்குப் புகழ்ச்சியாக, 6 அவருடைய தயவுள்ள விருப்பத்தின்படியே, இயேசுகிறிஸ்துவின் மூலமாக அவருக்குச் சொந்த பிள்ளைகளாகும்படி நம்மை முன்குறித்திருக்கிறார். 7 தேவனுடைய கிருபையின் ஐசுவரியத்தின்படியே இயேசுகிறிஸ்துவினுடைய இரத்தத்தினாலே பாவமன்னிப்பாகிய மீட்பு இவருக்குள் நமக்கு உண்டாயிருக்கிறது. 8 அந்தக் கிருபையை அவர் எல்லா ஞானத்திலும் புத்தியிலும் எங்களுக்குள் பெருகப்பண்ணினார். 9 காலங்கள் நிறைவேறும்போது விளங்கும் ஒழுங்கின்படி பரலோகத்திலிருக்கிறவைகளும் பூலோகத்திலிருக்கிறவைகளுமாகிய எல்லாம் கிறிஸ்துவிற்குள்ளே ஒன்று சேர்க்கப்படவேண்டுமென்று, 10 தமக்குள்ளே தீர்மானித்திருந்த அவருடைய தயவுள்ள திட்டத்தின் இரகசியத்தை எங்களுக்கு அறிவித்தார். 11 மேலும் கிறிஸ்துவின்மேல் முன்பு நம்பிக்கையாக இருந்த நாங்கள் அவருடைய மகிமைக்குப் புகழ்ச்சியாக இருப்பதற்காக, 12 அவருடைய விருப்பத்தின் ஆலோசனைக்குத்தக்கதாக எல்லாவற்றையும் நடப்பிக்கிற அவருடைய தீர்மானத்தின்படியே நாங்கள் முன்குறிக்கப்பட்டு, கிறிஸ்துவிற்குள் அவருடைய உரிமைப்பங்காகும்படி தெரிந்துகொள்ளப்பட்டோம். 13 நீங்களும் உங்களுடைய இரட்சிப்பின் நற்செய்தியாகிய சத்திய வசனத்தைக்கேட்டு, விசுவாசிகளானபோது, வாக்குத்தத்தம்பண்ணப்பட்ட பரிசுத்த ஆவியானவரால் அவருக்குள் முத்திரைபோடப்பட்டீர்கள். 14 அவருக்குச் சொந்தமானவர்கள் அவருடைய மகிமைக்குப் புகழ்ச்சியாக மீட்கப்படுவார்கள் என்பதற்கு ஆவியானவர் நம்முடைய உரிமைப்பங்கின் உத்திரவாதமாக இருக்கிறார்.

அவர்கள் அறிவொளி பெறுவதற்காகப் பவுல் ஜெபிக்கிறார்

அவர்கள் மனந்திரும்பியதற்காகப் பவுல் தேவனுக்கு நன்றி செலுத்துகிறார். சத்தியத்தை அறியும் அறிவில் அவர்கள் மேலும் ஒளிபெற்று, நற்செய்தியின் ஆசீர்வாதங்களையும் அதை அருளிய மகிமையுள்ளவரையும் முழுமையாகப் புரிந்துகொள்ள வேண்டும் என்று ஜெபிக்கிறார். அவருடைய வல்லமையால் கிறிஸ்து மரித்தோரிலிருந்து எழுப்பப்பட்டு, இவ்வுலகிலும் வரப்போகும் உலகிலும் மிக உயர்ந்த நிலைக்கும் ஆளுகைக்கும் உயர்த்தப்பட்டார். சபையின் நன்மைக்காக எல்லாம் அவருக்குக் கீழ்ப்படுத்தப்பட்டுள்ளன. சபை குறிப்பாக அவருடைய சரீரமாகக் காணப்படுகிறது; அவரே அதன் உன்னதமான தலை. எல்லா இடங்களிலும் எல்லா மக்களையும் நிரப்புகிறவரும், எல்லாவற்றிலும் எல்லாமாக இருக்கிறவருமான அவரிடமிருந்து சபை தனது ஆவிக்குரிய வரங்களையும் கிருபைகளையும் முழுமையாகப் பெறுகிறது.

எபேசியர் 1:15–23

15 எனவே, கர்த்தராகிய இயேசுவின்மேல் உள்ள உங்களுடைய விசுவாசத்தையும், பரிசுத்தவான்கள் எல்லோர்மேலும் உள்ள உங்களுடைய அன்பையும்குறித்து நான் கேள்விப்பட்டு, 16 இடைவிடாமல் உங்களுக்காக ஸ்தோத்திரம்பண்ணி, என் ஜெபங்களில் உங்களை நினைத்து, 17 நம்முடைய கர்த்தராகிய இயேசுகிறிஸ்துவின் தேவனும் மகிமையின் பிதாவுமானவர் தம்மை நீங்கள் அறிந்துகொள்வதற்கான ஞானத்தையும் தெளிவையும் அளிக்கிற ஆவியை உங்களுக்குத் தந்தருளவேண்டுமென்றும், 18 அவர் நம்மை அழைத்ததினாலே நமக்கு உண்டாயிருக்கிற நம்பிக்கை என்னவென்றும், பரிசுத்தவான்களிடத்தில் தமக்கு உண்டாயிருக்கிற உரிமைப்பங்கினுடைய மகிமையின் ஐசுவரியம் என்னவென்றும்; 19 தாம் கிறிஸ்துவை மரித்தோரிலிருந்து உயிரோடு எழுப்பி, அவரிடத்தில் நடப்பித்த தமது பலத்த வல்லமையின்படியே விசுவாசிக்கிறவர்களாகிய நம்மிடம் காண்பிக்கும் அவருடைய வல்லமையின் மகா மேன்மையான மகத்துவம் என்னவென்றும், நீங்கள் அறியும்படிக்கு, அவர் உங்களுக்குப் பிரகாசமுள்ள மனக்கண்களைக் கொடுக்கவேண்டும் என்றும் வேண்டிக்கொள்ளுகிறேன். 20 எல்லா ஆளுகைக்கும், அதிகாரத்திற்கும், வல்லமைக்கும், கர்த்தத்துவத்திற்கும், இக்காலத்தில் மட்டுமல்ல வருங்காலத்திற்கும் பெயர்பெற்றிருக்கும் எல்லா நாமத்திற்கும் மேலாக அவர் உயர்ந்திருக்கத்தக்கதாக, 21 அவரை உன்னதங்களில் தம்முடைய வலதுபக்கத்தில் உட்காரும்படிச் செய்து, 22 எல்லாவற்றையும் அவருடைய பாதங்களுக்குக் கீழ்ப்படுத்தி, 23 எல்லாவற்றையும் எல்லாவற்றாலும் நிரப்புகிறவருடைய நிறைவாகிய சரீரமான சபைக்கு அவரை எல்லாவற்றிற்கும் மேலான தலையாகத் தந்தருளினார்.

நியாயப்பிரமாணத்தாலோ தகுதியாலோ அல்ல, விசுவாசத்தின் வழியாக இரட்சிக்கப்படுதல்

எபேசியரின் நன்றியுணர்வைத் தூண்டுவதற்காக, அவர்கள் மீறுதல்களிலும் பாவங்களிலும் மரித்தவர்களாக இருந்தபோது அவர்களை உயிர்ப்பித்த, அல்லது தமது கிருபையால் நிரப்பிய கிறிஸ்துவின் அன்பைப் பவுல் அவர்களுக்கு நினைவூட்டுகிறார். அவர்கள் பிற தெய்வங்களை வழிபட்டவர்களாக இருந்தபோது அவர்களுடைய குணமும் நடத்தையும் எப்படியிருந்தன என்பதை விவரிக்கிறார். பின்னர், மனந்திரும்பிய யூதர்கள் சார்பாக, தாங்களும் மனந்திரும்புவதற்கு முன் அதேபோல வாழ்ந்ததை ஒப்புக்கொள்கிறார்; இதனால் யூதரல்லாதவர்களைப் போலவே அவர்களும் இயல்பினால் கோபாக்கினையின் பிள்ளைகளாகியிருந்தார்கள். ஆனால் தேவன் தமது மிகுந்த இரக்கத்தினாலும், தாம் இலவசமாக அளிக்கும் கிருபையினாலும் அவர்களுடைய இரட்சிப்பிற்கான வழியை ஏற்படுத்தி அவர்களை உயிர்ப்பித்திருந்தார்: யூதர்களையும் யூதரல்லாதவர்களையும் பாவத்தின் மரணத்திலிருந்து நீதியின் வாழ்விற்குக் கிறிஸ்துவில் உயிர்ப்பித்திருந்தார். அவர் அவர்களை ஒன்றாக எழுப்பி, கிறிஸ்துவின் உயிர்த்தெழுதலால் அவர்களுடைய சொந்த உயிர்த்தெழுதலின் முன்னனுபவத்தையும், அவர் உயர்த்தப்பட்டதன் மூலம் அவர்வழியாகத் தாங்களும் பரலோக இடங்களில் ஏற்றுக்கொள்ளப்படலாம் என்ற நம்பிக்கையையும் அளித்திருந்தார். இதில் கிறிஸ்து இயேசுவின் வழியாகத் தமது இரக்கமும் மன்னிப்பும் கொண்ட ஒப்பற்ற செல்வத்தை வெளிப்படுத்தினார். ஏனெனில் தேவனுடைய இரக்கத்தால், விசுவாசத்தின் வழியாகவே அவர்கள் இரட்சிக்கப்பட்டார்கள்: மோசேயின் நியாயப்பிரமாணச் செயல்களாலோ, தங்களுடைய சொந்தத் தகுதி எதனாலுமோ அல்ல; “யாரும் பெருமைபாராட்டாதபடி”, தேவனுடைய இலவச ஈவினாலும் சித்தத்தினாலுமே இரட்சிக்கப்பட்டார்கள். ஏனெனில் அவர்கள் அவருடைய படைப்பாக இருந்து, நற்செயல்களைச் செய்வதற்காக அவரால் கிறிஸ்து இயேசுவில் படைக்கப்பட்டார்கள். தமது பரிசுத்த ஆவியானவரின் செயல்பாட்டின் மூலம் அந்த நற்செயல்களைச் செய்யும் வல்லமை அவர்களுக்கு இருக்க வேண்டும் என்று தேவன் முன்னரே தீர்மானித்திருந்தார்.

எபேசியர் 2:1–10

1 அக்கிரமங்களினாலும் பாவங்களினாலும் மரித்தவர்களாக இருந்த உங்களை உயிர்ப்பித்தார். 2 அவைகளில் நீங்கள் முற்காலத்திலே இந்த உலக வழக்கத்திற்கு ஏற்றபடியும், கீழ்ப்படியாத பிள்ளைகளிடம் இப்பொழுது செயலாற்றும் ஆகாயத்து அதிகாரப் பிரபுவின் ஆவிக்குரியபடியும் நடந்துகொண்டீர்கள். 3 அவர்களுக்குள்ளே நாமெல்லோரும் முற்காலத்திலே நமது சரீர விருப்பத்தின்படியே நடந்து, நமது சரீரமும் மனதும் விரும்பினவைகளைச் செய்து, சுபாவத்தினாலே மற்றவர்களைப்போலக் கோபத்தின் பிள்ளைகளாக இருந்தோம். 4 தேவனோ இரக்கத்தில் செல்வந்தமுள்ளவராக நம்மில் அன்புகூர்ந்த தம்முடைய மிகுந்த அன்பினாலே, 5 அக்கிரமங்களில் மரித்தவர்களாக இருந்த நம்மைக் கிறிஸ்துவோடு உயிர்ப்பித்தார்; கிருபையினாலே இரட்சிக்கப்பட்டீர்கள்; 6 கிறிஸ்து இயேசுவிற்குள் அவர் நம்மேல் வைத்த தயவினாலே, தம்முடைய கிருபையின் மகா மேன்மையான செல்வத்தை வருங்காலங்களில் விளங்கச்செய்வதற்காக, 7 கிறிஸ்து இயேசுவிற்குள் நம்மை அவரோடு எழுப்பி, உன்னதங்களிலே அவரோடு உட்காரவும் செய்தார். 8 கிருபையினாலே விசுவாசத்தைக் கொண்டு இரட்சிக்கப்பட்டீர்கள்; இது உங்களால் உண்டானது இல்லை, இது தேவனுடைய ஈவு; 9 ஒருவரும் பெருமைப்படாதபடி இது செயல்களினால் உண்டானது இல்லை; 10 ஏனென்றால், நற்செயல்களைச் செய்கிறதற்கு நாம் கிறிஸ்து இயேசுவிற்குள் உருவாக்கப்பட்டு, தேவனுடைய செய்கையாக இருக்கிறோம்; அவைகளில் நாம் நடக்கும்படி அவர் முன்னதாக அவைகளை ஆயத்தம்பண்ணியிருக்கிறார்.

யூதர்களும் யூதரல்லாதவர்களும் கிறிஸ்துவில் ஒரே சபையாக்கப்படுதல்

யூதனும் யூதரல்லாதவரும் இருந்த வீழ்ச்சியடைந்த நிலையை விவரித்தபின், தாங்கள் மனந்திரும்புவதற்கு முன்பு கிறிஸ்துவைப் பற்றிய அறிவு இல்லாதவர்களாக இருந்ததை நினைவுகூரும்படி பவுல் யூதரல்லாதவர்களைக் கேட்டுக்கொள்கிறார். அவர்கள் யூத மக்களின் சிறப்புரிமைகளிலிருந்து விலக்கப்பட்டு, ஆபிரகாமுடன் செய்யப்பட்ட வாக்குத்தத்தத்தின் உடன்படிக்கையில் பங்கில்லாதவர்களாகவும், பாவமன்னிப்பைக் குறித்தோ ஆத்துமாவின் அழியாமையைக் குறித்தோ உறுதியான நம்பிக்கை இல்லாதவர்களாகவும், உலகத்தில் தேவனற்றவர்களாகவும் இருந்தார்கள். ஆனால் இப்போது, வாக்குத்தத்தத்தின் உடன்படிக்கைக்குத் தூரமாக இருந்தவர்களைக் கிறிஸ்துவின்மீதுள்ள விசுவாசத்தின் மூலம், கிறிஸ்துவின் இரத்தத்தால் தேவன் அருகில் கொண்டுவந்துள்ளார். கிறிஸ்து யூதனுக்காகவும் யூதரல்லாதவருக்காகவும் மரித்து சமாதான பலியானார்; இரு மக்களினத்திலும் உள்ள விசுவாசிகளிலிருந்து ஒரே சபையை உருவாக்கியுள்ளார். தமது மாம்சத்தில் அடைந்த மரணத்தால், அவர்களைப் பிரித்துப் பகைமையை உண்டாக்கிய யூதச் சட்டத்திட்டங்களை ஒழித்துவிட்டார். இருவரையும் தமக்குள் ஒரே புதிய மனிதனாக, அல்லது ஒரே புதிய சரீரமாக ஒன்றிணைத்து, அவர்களிடையே சமாதானத்தை ஏற்படுத்தியுள்ளார். இவ்வாறு, பாவத்தால் தேவனுக்கும் மனிதனுக்கும் இடையே ஏற்பட்ட பகைமையைக் கொன்று, அல்லது அழித்து, தமது சரீரத்தின் பாவநிவாரண பலியினால் இருவரையும் தேவனோடு ஒப்புரவாக்கினார். தமது உயிர்த்தெழுதலுக்குப் பின், தமது அப்போஸ்தலர்கள் வழியாக யூதனுக்கும் யூதரல்லாதவருக்கும் ஒரேபோல சமாதானத்தையும் ஒப்புரவாகுதலையும் பிரசங்கித்தார். அவர்வழியாக இருவரும் ஒரே பரிசுத்த ஆவியானவரால் ஒரே பிதாவை அணுகுகிறார்கள். யூதரல்லாதவர்கள் இனி அந்நியர்களல்ல; அவர்கள் யூதர்களோடு இணைக்கப்பட்டு, அவருடைய பரிசுத்த மக்களுக்குரிய அதே சிறப்புரிமைகளில் அனுமதிக்கப்படுகிறார்கள். அவர்கள் அவருடைய குடும்பத்தை, அல்லது கண்ணுக்குப் புலப்படும் சபையைச் சேர்ந்தவர்கள். அது பழைய ஏற்பாட்டுக் காலத்தின் தீர்க்கதரிசிகளுடைய போதனையின் மீதும் புதிய ஏற்பாட்டுக் காலத்தின் அப்போஸ்தலர்களுடைய போதனையின் மீதும் கட்டப்பட்டுள்ளது. இயேசு கிறிஸ்துவே மூலைக்கல்லாக இருந்து, யூதர்களையும் யூதரல்லாதவர்களையும் ஒரே கட்டடத்தில் ஒன்றிணைக்கிறார். அவரில், யூதர்களும் யூதரல்லாதவர்களும் பொருத்தி இணைக்கப்பட்ட அந்தக் கட்டடம், புதிதாக மனந்திரும்புகிறவர்கள் சேர்க்கப்படுவதால் தேவனுக்குப் பரிசுத்த ஆலயமாக வளர்கிறது. மேலும், கிறிஸ்துவின் வழியாக அவருடைய சகோதரர்களாகிய அவர்கள், தேவனுடைய வாசஸ்தலமாகும்படி ஒன்றாகக் கட்டப்படுகிறார்கள்; அவருடைய ஆவியானவர் அவர்களுக்குள் வாழ்கிறார்.

எபேசியர் 2:11–22

11 எனவே, முன்பு சரீரத்தின்படி யூதரல்லாதவராக இருந்து, சரீரத்தில் கையினாலே விருத்தசேதனம்பண்ணப்பட்டவர்களால் விருத்தசேதனம்பண்ணப்பாடாதவர்கள் என்று சொல்லப்பட்ட நீங்கள், 12 அக்காலத்திலே கிறிஸ்துவைச் சேராதவர்களும், இஸ்ரவேலுடைய குடியுரிமைக்குப் புறம்பானவர்களும், வாக்குத்தத்தத்தின் உடன்படிக்கைகளுக்கு அந்நியர்களாகவும், நம்பிக்கை இல்லாதவர்களும், இந்த உலகத்தில் தேவனில்லாதவர்களுமாக இருந்தீர்கள் என்பதை நினைத்துக்கொள்ளுங்கள். 13 முன்னே தூரத்தில் இருந்த நீங்கள் இப்பொழுது கிறிஸ்து இயேசுவிற்குள் கிறிஸ்துவின் இரத்தத்தினாலே அருகில் வந்தீர்கள். 14 எப்படியென்றால், அவரே நம்முடைய சமாதான காரணராகி, இருகூட்டத்தாரையும் ஒன்றாக்கி, பகையாக நின்ற பிரிவினையாகிய நடுச்சுவரைத் தகர்த்து, 15 சட்டதிட்டங்களாகிய நியாயப்பிரமாணத்தைத் தம்முடைய சரீரத்தினாலே ஒழித்து, இருகூட்டத்தாரையும் அவருக்குள்ளாக ஒரே புதிய மனிதனாக உருவாக்கி, இப்படிச் சமாதானம்பண்ணி, 16 பகையைச் சிலுவையினால் கொன்று, அதினாலே இருகூட்டத்தாரையும் ஒரே சரீரமாக தேவனுக்கு ஒப்புரவாக்கினார். 17 அல்லாமலும், அவர் வந்து, தூரத்தில் இருந்த உங்களுக்கும், அருகில் இருந்த அவர்களுக்கும், சமாதானத்தை நற்செய்தியாக அறிவித்தார். 18 அப்படியே நாம் இருகூட்டத்தாரும் ஒரே ஆவியானவராலே பிதாவினிடத்தில் சேரும் பாக்கியத்தை அவர் மூலமாகப் பெற்றிருக்கிறோம். 19 ஆகவே, நீங்கள் இனி அந்நியர்களும் பரதேசிகளுமாக இல்லாமல், பரிசுத்தவான்களோடு ஒரே நகரத்தாரும் தேவனுடைய குடும்பத்தினராக இருந்து, 20 அப்போஸ்தலர்கள் தீர்க்கதரிசிகள் என்பவர்களுடைய அஸ்திபாரத்தின்மேல் கட்டப்பட்டவர்களுமாக இருக்கிறீர்கள்; அதற்கு இயேசுகிறிஸ்துவே மூலைக்கல்லாக இருக்கிறார்; 21 அவர்மேல் மாளிகை முழுவதும் சீராக இணைக்கப்பட்டு, கர்த்தருக்குள் பரிசுத்த ஆலயமாக எழும்புகிறது; 22 அவர்மேல் நீங்களும் ஆவியானவராலே தேவன் தங்கும் இடமாகச் சேர்த்துக் கட்டப்பட்டுவருகிறீர்கள்.