யோவானின் இரண்டாம் கடிதம்

யோவான் ஒரு தாய்க்கும் அவளுடைய பிள்ளைகளுக்கும் எழுதுகிறார்

ஞானவாதிகளின் ஒரு பிரிவினர் என்று கருதப்படும் கள்ளப்போதகர்களின் கவர்ச்சிகளையும் தீங்கு விளைவிக்கும் தவறான போதனைகளையும் குறித்து, ஒரு கிறிஸ்தவத் தாயையும் அவளுடைய பிள்ளைகளையும் எச்சரிக்க யோவான் இந்தக் கடிதத்தை எழுதுகிறார்.

கி.பி. 96

இண்டியன் ரிவைஸ்டு வெர்ஸன் (IRV) - தமிழ் (IRVTAM)

யோவான் ஒரு தாயையும் அவளுடைய பிள்ளைகளையும் வாழ்த்துகிறார்

வாழ்த்துரை.

2 யோவான் 1:1–3

1 நமக்குள் நிலைத்துநிற்கிறதும் என்றென்றைக்கும் நம்மோடு இருப்பதுமாகிய சத்தியத்திற்காக, நான்மட்டும் அல்ல, சத்தியத்தை அறிந்திருக்கிற எல்லோரும் சத்தியத்தின்படி நேசித்திருக்கிறவளும், 2 தெரிந்துகொள்ளப்பட்டத் தாயாருக்கும், அவளுடைய பிள்ளைகளுக்கும், மூப்பனாகிய நான் எழுதுகிறதாவது: 3 பிதாவாகிய தேவனாலும் பிதாவின் குமாரனாக இருக்கிற கர்த்தராகிய இயேசுகிறிஸ்துவினாலும், கிருபையும் இரக்கமும், சமாதானமும், சத்தியத்தோடும் அன்போடும்கூட உங்களோடு இருப்பதாக.

அன்பில் நடந்து, வஞ்சகர்களைப் புறக்கணியுங்கள்

அவளுடைய பிள்ளைகளில் சிலர் நற்செய்தியின் தூய போதனைகளின்படி வாழ்வதைக் கண்டதில் தனக்கு ஏற்பட்ட மகிழ்ச்சியை யோவான் தெரிவிக்கிறார். இதுவரை கொடுக்கப்படாத ஒரு கட்டளைக்குக் கீழ்ப்படிவதாக அல்லாமல், ஆதிமுதலே கொடுக்கப்பட்டதும் அப்போஸ்தலர்கள் எப்போதும் பிரசங்கித்ததுமான கட்டளைக்குக் கீழ்ப்படிந்து கிறிஸ்தவ அன்பைக் காட்டும்படி அவளை வலியுறுத்துகிறார். தேவனுடைய கட்டளைகளுக்குக் கீழ்ப்படிந்து அவற்றின்படி நடப்பதே அவர்மீதுள்ள அன்பின் பெரிய சான்றாகும். தேவன் அனுப்பியவரை அவர்கள் விசுவாசிக்க வேண்டும் என்பதே அந்தப் பெரிய கட்டளை (யோவான் 6:29). அவர்களுடைய அன்புக்கும் கீழ்ப்படிதலுக்கும் சரியான நோக்கங்களும் கொள்கைகளும் இருக்கும்படி, இந்தப் போதனைகள் ஆதிமுதலே அவர்களுக்குப் பிரசங்கிக்கப்பட்டன. இப்போது இவற்றை அவர்களுக்கு நினைவூட்டுவது குறிப்பாக அவசியமாகிறது. ஏனெனில், இயேசு கிறிஸ்து மாம்சத்தில் வந்ததை மறுத்து, அவருடைய மரணத்தையும் பாடுகளையும் உண்மை நிகழ்வுகளாக அல்லாமல் வெறும் தோற்றங்களாகக் கருதும் வஞ்சகர்கள் பலர் உலகத்தில் புறப்பட்டிருக்கிறார்கள். இத்தகைய கோட்பாட்டைப் போதிக்கும் ஒவ்வொரு போதகரும் இயேசு கிறிஸ்து முன்னறிவித்த பொய்த்தீர்க்கதரிசியும் அந்திக்கிறிஸ்துவுமாவார் (1 யோவான் 2:18). ஆகவே, அவர்களால் வஞ்சிக்கப்படாதிருக்கும்படி தேர்ந்தெடுக்கப்பட்ட அம்மாளையும் அவளுடைய பிள்ளைகளையும் யோவான் வலியுறுத்துகிறார். கிறிஸ்துவும் அவருடைய அப்போஸ்தலர்களும் போதித்தவற்றிற்கு மாறான கோட்பாடுகளைப் போதித்துத் தவறிப்போகிற எவருக்கும் பிதாவாகிய தேவனுடன் ஐக்கியம் இல்லை. ஆனால் இந்தப் போதனைகளில் நிலைத்திருப்பவருக்குத் தமது பிதாவாகிய தேவனுடனும் தமது இரட்சகராகிய தேவனுடைய குமாரனுடனும் ஐக்கியம் உண்டு. மனிதகுலத்திற்காகக் கிறிஸ்து மாம்சத்தில் வந்து பாடுபட்டார் என்ற போதனையை ஏற்றுக்கொள்ளாத எந்தப் போதகரையும் வீட்டில் ஏற்றுக்கொள்ளவோ, அவர் வெற்றிபெற வாழ்த்துக் கூறவோ கூடாது. ஏனெனில் அத்தகைய மனிதருக்குப் பாதுகாப்பும் ஊக்கமும் அளித்து, அவரைக் கிறிஸ்தவ சகோதரராக நடத்துகிற எவரும், அவருடைய ஊழியத்திற்கு நம்பகத்தன்மை அளித்து, அவர் செய்யக்கூடிய தீங்கில் பங்குகொள்கிறார்.

2 யோவான் 1:4–13

4 பிதாவினால் நாம் பெற்ற கட்டளையின்படி உம்முடைய பிள்ளைகளில் சிலர் சத்தியத்திலே நடக்கிறதை நான் பார்த்து மிகவும் சந்தோஷப்பட்டேன். 5 இப்பொழுதும் தாயாரே, நாம் ஒருவரையொருவர் நேசிக்கவேண்டும் என்று, உமக்குப் புதிய கட்டளையாக எழுதாமல், ஆரம்பம் முதல் நமக்கு உண்டாயிருக்கிற கட்டளையாக எழுதி, உம்மை வேண்டிக்கொள்ளுகிறேன். 6 நாம் அவருடைய கட்டளைகளின்படி நடப்பதே அன்பு; நீங்கள் ஆரம்பமுதல் கேட்டிருக்கிறபடி நடந்துகொள்ளவேண்டிய கட்டளை இதுவே. 7 சரீரத்தில் வந்த இயேசுகிறிஸ்துவை அறிக்கைபண்ணாத அநேக ஏமாற்றுக்காரர்கள் உலகத்திலே தோன்றியிருக்கிறார்கள்; இப்படிப்பட்டவனே ஏமாற்றுக்காரனும், அந்திக்கிறிஸ்துவுமாக இருக்கிறான். 8 உங்களுடைய செய்கைகளின் பலனை இழந்துபோகாமல், பூரண பலனைப் பெற்றுக்கொள்வதற்கு எச்சரிக்கையாக இருங்கள். 9 கிறிஸ்துவின் உபதேசத்திலே நிலைத்திருக்காமல் மீறி நடக்கிற எவனும் தேவனை உடையவன் இல்லை, கிறிஸ்துவின் உபதேசத்தில் நிலைத்திருக்கிறவனோ பிதாவையும் குமாரனையும் உடையவன். 10 ஒருவன் உங்களிடம் வந்து இந்த உபதேசத்தைக் கொண்டுவராமல் இருந்தால், அவனை உங்களுடைய வீட்டிலே ஏற்றுக்கொள்ளாமலும், அவனுக்கு வாழ்த்துதல் சொல்லாமலும் இருங்கள். 11 அவனுக்கு வாழ்த்துதல் சொல்லுகிறவன் அவனுடைய கெட்டசெய்கைகளுக்கும் பங்குள்ளவன் ஆகிறான். 12 உங்களுக்கு எழுதவேண்டிய காரியங்கள் அதிகம் உண்டு; காகிதத்தினாலும் மையினாலும் அவைகளை எழுத எனக்கு மனம் இல்லை. உங்களுடைய சந்தோஷம் நிறைவாக இருப்பதற்காக உங்களிடம் வந்து, முகமுகமாகப் பேசலாம் என்று நம்பியிருக்கிறேன். 13 தெரிந்துகொள்ளப்பட்ட உம்முடைய சகோதரியின் பிள்ளைகள் உமக்கு வாழ்த்துதல் சொல்லுகிறார்கள். ஆமென்.

யோவானின் மூன்றாவது கடிதம்

யோவான் காயுவுக்கு எழுதுகிறார்

காயுவின் உறுதியான விசுவாசத்தையும் சில கிறிஸ்தவ சகோதரர்களிடமும் அந்நியர்களிடமும் அவர் காட்டிய அன்பையும் பாராட்டவும், அவர்களை மீண்டும் அவருடைய பாதுகாப்புக்கும் அன்புக்கும் ஒப்படைக்கவும் யோவான் இந்தக் கடிதத்தை அவருக்கு எழுதுகிறார். யோவானின் அதிகாரத்தை மறுத்து, அவருடைய அறிவுரைகளுக்குக் கீழ்ப்படியாத தியோத்திரேப்புவின் துணிகரமான அகந்தையைக் கண்டிக்கவும், அதைக் குறித்துக் காயுவை எச்சரிக்கவும் அவர் எழுதுகிறார். மேலும், தேமேத்திரியுவைக் காயுவின் கவனத்திற்குப் பரிந்துரைப்பதுடன், சபையார் பின்பற்றவேண்டிய முன்மாதிரியாகவும் பரிந்துரைக்கிறார்.

யோவான் காயுவைப் பாராட்டித் தியோத்திரேப்புவைக் கடிந்துகொள்கிறார்

வயதுமுதிர்ந்த அப்போஸ்தலராகிய யோவான், காயுவை அறிந்த அனைவராலும் நேசிக்கப்பட்டவரும், சத்தியத்தில் யோவானாலும் நேசிக்கப்பட்டவருமான காயுவுக்கு எழுதுகிறார். காயு நீண்ட காலம் சபைக்கு ஆசீர்வாதமாக வாழும்படி, இவ்வாழ்வில் அவருடைய செழிப்பும் உடல்நலமும் அவருடைய நற்பண்புகளுக்கும் ஆவிக்குரிய வளர்ச்சிக்கும் இணையாக இருக்கவேண்டும் என்று அவர் ஜெபிக்கிறார். நற்செய்தியின் உண்மையான போதனைகளில் காயு தொடர்ந்து நிலைத்திருக்கிறார் என்று கேள்விப்பட்டதால் தமக்கு ஏற்பட்ட பெருமகிழ்ச்சியை அவர் தெரிவிக்கிறார். உண்மையான விசுவாசம் கோருகிறபடி காயு சகோதரர்களிடமும் அந்நியர்களிடமும் நடந்துகொண்டிருக்கிறார். அவருடைய கிறிஸ்தவ அன்பையும் தயவையும் குறித்து அவர்கள் சபைக்கு முன்பாகச் சாட்சி கூறியிருக்கிறார்கள். தேவனுடைய ஆவியானவர் அருளும் தெய்வீக அன்பின் நெறியின்படி, தேவனுக்குத் தகுதியான முறையில் இரண்டாவது முறையும் அவர்களுக்கு உதவுவது அவருக்கு நலமாயிருக்கும். ஏனெனில் கிறிஸ்துவின் நிமித்தமாகவும், அவருடைய நற்செய்தியை யூதரல்லாத மக்களுக்குப் பிரசங்கிப்பதற்காகவுமே அந்தச் சகோதரர்கள் புறப்பட்டுச் சென்றார்கள். தாங்கள் பணத்திற்காக உழைக்கிறார்கள் என்ற சந்தேகத்தால் தங்கள் பணியின் வெற்றி குறைந்துபோகாதபடி, தங்கள் உழைப்புக்காக அவர்கள் எதையும் பெற்றுக்கொள்ளவில்லை. நற்செய்தியின் நிமித்தமாகத் தங்கள் வீடுகளை விட்டுப் புறப்பட்டு நீண்ட பயணங்களை மேற்கொள்ளும் ஊழியர்களை, வீட்டில் தங்கியிருப்பவர்கள் தங்கள் வீடுகளில் வரவேற்கவேண்டும். இவ்வாறு தங்கள் கொடைகளால் அவர்களுக்கு உதவியும் ஊக்கமும் அளித்து, அவர்களுடைய உடன் ஊழியர்களாக வேண்டும். காயு உறுப்பினராக இருந்த சபைக்கு யோவான் இதைக் குறித்து ஒரு கடிதம் எழுதியிருந்தார். ஆனால் அகந்தையுடன் முதன்மை நிலையைத் தனக்கென எடுத்துக்கொண்ட தியோத்திரேப்பு, அவருடைய அப்போஸ்தல அதிகாரத்தை மறுத்தான்; பெரும்பாலும் அக்கடிதத்தையும் வெளிவராமல் தடுத்திருக்கக்கூடும். அவனுடைய செயல்கள் சத்தியத்திற்கும் கிறிஸ்தவத்திற்கும் இடையூறும் தீங்கும் விளைவித்ததால், அவனைத் தண்டிப்பதன் மூலம் வலுவான தாக்கத்தை ஏற்படுத்தப்போவதாக யோவான் எச்சரிக்கிறார். தியோத்திரேப்பு அப்போஸ்தலர்களைப் பற்றி அவதூறு பேசி, அவர்களுடைய அறிவுரைகளுக்குக் கீழ்ப்படிய மறுத்து, சகோதரர்களின் தேவைகளைச் சந்திப்பதன் மூலம் அந்த அறிவுரைகளுக்குக் கீழ்ப்படிந்தவர்களைச் சபையிலிருந்து வெளியேற்றினான். நன்மை செய்கிறவர்கள் தேவனால் பிறந்தவர்கள் என்பதை அறிந்து, தியோத்திரேப்புவின் முன்மாதிரியைப் பின்பற்றாமல் நன்மையானதைப் பின்பற்றும்படி யோவான் அவர்களை வலியுறுத்துகிறார். இதற்கு மாறாக, தேமேத்திரியுவின் கிறிஸ்தவ நற்குணங்களையும் நற்பண்புகளையும் அனைவரும் பாராட்டுகிறார்கள்; நற்செய்தியும் அவருக்குச் சாட்சி அளிக்கிறது. சத்தியமும் பாரபட்சமற்றதுமாகத் தமது சாட்சி இருப்பதை அவர்கள் அறிந்திருக்கிற யோவானும் அவருக்குச் சாட்சி அளித்து, அவருடைய முன்மாதிரியைப் பரிந்துரைக்கிறார். இந்தக் காரியங்களைக் குறித்து இன்னும் விரிவாக எழுதாததற்குக் காரணம் கூறி, விரைவில் காயுவை நேரில் காணத் திட்டமிட்டிருப்பதாகத் தெரிவிக்கிறார். தமது ஆசீர்வாதத்தையும் வாழ்த்துகளையும் தெரிவிக்கிறார்.

3 யோவான் 1

1 மூப்பனாகிய நான் சத்தியத்தின்படி நேசிக்கிற பிரியமான காயுவிற்கு எழுதுகிறதாவது: 2 பிரியமானவனே, உன் ஆத்துமா வாழ்கிறதுபோல நீ எல்லாவற்றிலும் வாழ்ந்து சுகமாக இருக்கும்படி ஜெபித்துக்கொள்கிறேன். 3 சகோதரர்கள் வந்து நீ சத்தியத்தில் நடந்துகொள்ளுகிறாய் என்று உன்னுடைய உண்மையைக்குறித்துச் சாட்சி கொடுத்தபோது அதிக சந்தோஷப்பட்டேன். 4 என் பிள்ளைகள் சத்தியத்திலே நடக்கிறார்கள் என்று நான் கேள்விப்படுகிற சந்தோஷத்தைவிட அதிகமான சந்தோஷம் எனக்கு இல்லை. 5 பிரியமானவனே, நீ சகோதரர்களுக்கும், அந்நியர்களுக்கும் செய்கிற எல்லாவற்றையும் உண்மையாகச் செய்கிறாய். 6 அவர்கள் உன்னுடைய அன்பைக்குறித்துச் சபைக்குமுன்பாகச் சாட்சி சொன்னார்கள்; தேவனுக்குத் தகுதியானபடி நீ அவர்களை வழியனுப்பிவைத்தால் நலமாக இருக்கும். 7 ஏனென்றால், அவர்கள் யூதரல்லாத மக்களிடம் ஒன்றும் வாங்காமல் தேவனுடைய நாமத்தினிமித்தம் புறப்பட்டுப்போனார்கள். 8 ஆகவே, நாம் சத்தியத்திற்கு உடன்வேலையாட்களாக இருப்பதற்காக அப்படிப்பட்டவர்களைச் சேர்த்துக்கொள்ளக் கடமைப்பட்டிருக்கிறோம். 9 நான் சபைக்கு எழுதினேன்; ஆனாலும் அவர்களில் முதன்மையாக இருக்கவிரும்புகிற தியோத்திரேப்பு எங்களை ஏற்றுக்கொள்ளவில்லை. 10 ஆகவே, நான் வந்தால், அவன் எங்களுக்கு எதிராகப் பொல்லாத வார்த்தைகளைப் பேசி, செய்துவருகிற செயல்களை ஞாபகப்படுத்துவேன். அவன் இப்படிச் செய்துவருவதும் போதாமல், தன்னுடைய சகோதரர்களை ஏற்றுக்கொள்ளாமலிருப்பது மட்டுமல்லாமல், ஏற்றுக்கொள்ள விருப்பமாக இருக்கிறவர்களையும் தடைசெய்து, சபைக்கு வெளியே தள்ளுகிறான். 11 பிரியமானவனே, நீ தீமையானதைப் பின்பற்றாமல், நன்மையானதைப் பின்பற்று, நன்மைசெய்கிறவன் தேவனால் உண்டாயிருக்கிறான்; தீமைசெய்கிறவன் தேவனைப் பார்த்தது இல்லை. 12 தேமேத்திரியு எல்லோராலும் நற்சாட்சி பெற்றதும் இல்லாமல், சத்தியத்தாலும் நற்சாட்சி பெற்றவன்; நாங்களும் சாட்சி கொடுக்கிறோம், எங்களுடைய சாட்சி உண்மை என்று அறிவீர்கள். 13 எழுதவேண்டிய காரியங்கள் அதிகம் உண்டு; ஆனால் மையினாலும், இறகினாலும் எழுத எனக்கு விருப்பம் இல்லை. 14 சீக்கிரமாக உன்னைப் பார்க்கலாம் என்று நம்பியிருக்கிறேன், அப்பொழுது முகமுகமாகப் பேசிக்கொள்ளுவோம். 15 உனக்கு சமாதானம் உண்டாவதாக. நண்பர்கள் உனக்கு வாழ்த்துதல் சொல்லுகிறார்கள். நண்பர்களைப் பெயர் பெயராக வாழ்த்துவாயாக.