Pwovèb Salomon yo (continued)

984 anvan Christ

Bib Sen An (BSA)

Pwovèb Yo 12–13

1 Nenpòt moun ki renmen disiplin, renmen konesans,

men sila ki rayi korije a, se bèt.

2 Yon bon moun va jwenn favè SENYÈ a;

men Bondye va kondane sila ki fè manèv mechanste a.

3 Yon nonm p ap etabli ak mal la;

men rasin moun dwat la p ap sòti menm.

4 Yon bon madanm se kouwòn a mari li;

men sila ki fè l wont lan se tankou pouriti nan zo li.

5 Panse a moun dwat yo jis;

men konsèy a mechan yo se desepsyon.

6 Pawòl a mechan yo kouche tann pyèj pou vèse san;

men bouch moun dwat yo va delivre yo.

7 Mechan yo va boulvèse e vin disparèt;

men kay a moun dwat yo va kanpe.

8 Yon nonm ap twouve glwa selon entèlijans li;

men sila ak panse pèvès la va meprize.

9 Meyè se sila ki enkoni an, men ki gen sèvitè,

pase sila ki onore pwòp tèt li e ki manke pen an.

10 Yon nonm ladwati gen respè pou lavi a bèt li;

men konpasyon a mechan an se mechanste.

11 Sila ki raboure tè li a va gen anpil pen;

men sila ki swiv bagay san valè yo manke bon konprann.

12 Moun mechan an vle pran piyaj a mechan yo;

men rasin ladwati yo va donnen fwi li.

13 Yon moun mechan pyeje pa transgresyon lèv li;

men moun dwat la va evite pwoblèm.

14 Yon nonm va satisfè avèk sa ki bon kon fwi a pawòl li,

e zèv lamen a yon nonm va retounen kote li.

15 Chemen a yon moun fou bon nan zye li;

men yon nonm saj koute konsèy.

16 Lè yon moun fou vekse, ou konnen sa vit;

men sila ki saj la evite wont.

17 Sila ki pale verite a pale sa ki dwat;

men yon fo temwen twonpe.

18 Genyen yon moun ki pale san pridans

tankou sila k ap goumen ak nepe yo;

men lang a saj la pote gerizon.

19 Lèv verite yo va etabli pou tout tan;

men lang ki bay manti a rete pou yon moman.

20 Desepsyon se nan kè a sila k ap fè manèv mechanste yo;

men konseye lapè yo gen jwa.

21 Nanpwen mal ki rive moun dwat yo;

men mechan yo plen ak twoub.

22 Lèv ki manti a abominab a SENYÈ a;

men sila ki aji nan fidelite, se plezi Li.

23 Yon moun pridan kache sa li konnen;

men kè moun san konprann pale jis nan foli.

24 Men a dilijan yo va kòmande;

men parese a va fè kòve.

25 Gwo pwoblèm nan kè a yon moun peze li desann;

men yon bon pawòl fè l leve.

26 Moun ladwati a se yon gid a vwazen li;

men chemen a mechan fè yo egare.

27 Yon nonm parese pa menm boukannen bèt lachas li,

men pi presye nan sa yon nonm posede se dilijans.

28 Nan chemen ladwati se lavi;

e nan wout li nanpwen lanmò.

13:1 Yon fis ki saj aksepte disiplin a papa l,

men yon mokè pa koute repwòch.

2 Fwi pawòl la ki soti nan bouch moun se rejwisans de sa ki bon;

men volonte moun enfidèl se vyolans.

3 Sila ki kontwole bouch li, konsève lavi li;

sila ki ouvri lèv li byen laj va detwi nèt.

4 Nanm a parese a anvi, e li pa jwenn;

men nanm a moun dilijan an vin gra.

5 Yon nonm dwat rayi sa ki fo;

men zak mechan yo degoutan e fè gwo wont.

6 Ladwati se yon pwotèj pou sila ki san fot la;

men mechanste fè pechè a vin souye nèt.

7 Genyen moun ki pretann yo rich, men yo pa gen anyen;

yon lòt pretann li malere men li gen gwo richès.

8 Ranson pou lavi a yon nonm rich se richès li;

men malere a pa tande menas.

9 Limyè a moun dwat la se rejwisans;

men lanp a mechan an va etenn.

10 Ògèy pa pote anyen sof ke konfli;

men sajès rete ak sila ki resevwa konsèy yo.

11 Richès ki sòti nan manti koule ale;

men sila ki rasanble ak men li, fè l grandi.

12 Lespwa jennen fè kè a malad;

men dezi acheve a se yon pyebwa lavi.

13 Sila ki meprize lenstriksyon va peye fwè a;

men sila ki respekte lòd yo va resevwa rekonpans li.

14 Lenstriksyon a saj yo se yon fontèn dlo lavi

pou detounen pèlen lanmò a.

15 Bon konprann pwodwi favè;

men chemen moun ki pa fidèl la di.

16 Tout moun ki pridan aji ak konesans;

men yon moun san konprann parèt ak foli li.

17 Yon mesaje mechan tonbe nan advèsite;

men sila ki pote pawòl ak bòn fwa a, pote gerizon

18 Mizè ak wont se pou sila ki manke disiplin nan;

men sila ki konsidere repwòch la va onore.

19 Yon dezi ki reyalize se dous a nanm nan,

men moun bèt pa vle kite mechanste.

20 Sila ki mache ak moun saj va vin saj;

men bon zanmi a moun ensanse a va soufri.

21 Se malè ki kouri dèyè pechè yo;

men moun dwat yo va pwospere.

22 Yon bon moun va lese eritaj pou pitit pitit li;

men richès a pechè yo konsève pou moun dwat yo.

23 Gen anpil manje nan tè malere a;

men li fin bale nèt akoz enjistis.

24 Sila ki ralanti baton li, rayi fis li;

men sila ki renmen l va ba li disiplin ak dilijans.

25 Moun dwat la gen kont pou satisfè dezi li;

men vant mechan an toujou gen bezwen.