Jérémie Pwofetize Kont Lame Neco a
Pwofesi Jérémie kont lame Farawon Neco a.
606 anvan Christ
Bib Sen An (BSA)
1 Sa ki te rive selon pawòl SENYÈ a a Jérémie, pwofèt la, konsènan nasyon yo.
2 Pou Égypte: konsènan lame Farawon Neco, wa Égypte la, ki te akote rivyè Euphrate nan Carkemisch, ke Nebucadnetsar, wa Babylone nan, te bat nèt nan katriyèm ane Jojakim, fis a Josias, wa Juda a.
3 “Alinye pwotèj ak boukliye
e pwoche pre pou batay la.
4 Sele cheval, e monte sou do yo;
pran pozisyon nou ak kas nan tèt!
Netwaye tout lans yo,
e mete abiman an bwonz!
5 Poukisa mwen te wè sa?
Yo pè nèt, y ap rale fè bak,
mesye pwisan yo fin bat nèt,
e sèl abri yo sove ale san gade dèyè.
Se gwo laperèz tout kote!”
deklare SENYÈ a.
6 Pa kite sila ki pi rapid la sove ale,
ni moun pwisan an chape poul li.
Nan nò, akote rivyè Euphrate la,
yo te glise, chape tonbe.
7 Se kilès sa ki leve tankou rivyè Nil la,
tankou rivyè ki gen dlo k ap jayi toupatou yo?
8 Égypte leve tankou rivyè Nil la,
menm tankou rivyè ki gen dlo k ap jayi toupatou yo.
Li te di: “Mwen va leve kouvri peyi sa a;
anverite, Mwen va detwi vil la ak moun ki rete ladann yo.”
9 An avan, cheval yo!
Kouri tankou moun fou, cha lagè yo!
Kite moun pwisan yo mache devan:
Éthiopie ak Puth ki manevre boukliye a,
Lidyen ki manevre e koube banza a.
10 Paske jou sa a se pou Senyè BONDYE dèzame yo,
yon jou vanjans,
pou L kapab fè vanjans Li sou lènmi Li yo.
Nepe a va devore vin satisfè,
Li va bwè kont li nan san yo;
paske va genyen yon sakrifis pou Senyè BONDYE dèzame yo,
nan peyi nò a, akote Larivyè Euphrate la.
11 Monte Galaad pou jwenn pomad gerizon an,
O fi vyèj Égypte la!
Anven nou te miltipliye remèd yo;
nanpwen gerizon pou nou.
12 Nasyon yo te tande de bagay wont ou an,
e tè a plen ak kri detrès ou;
paske yon gran gèrye tonbe sou gran gèrye,
e toulède tonbe atè ansanm.
Rekabit yo Pran Refij nan Jérusalem
Rekabit yo pran refij nan Jérusalem pou yo chape anba lame Kaldeyen yo.
1 Pawòl ki te rive a Jérémie soti nan SENYÈ a nan jou a Jojakim yo, fis a Josias la, wa Juda a, te di: 2 “Ale lakay Rekabit yo. Pale avèk yo e mennen yo antre lakay SENYÈ a, nan youn nan chanm yo, e bay yo diven pou yo bwè.”
3 Konsa, mwen te pran Jaazania, fis a Jérémie an, fis a Habazinia a, frè li yo, tout fis li yo ak tout kay Rekabit yo, 4 epi mwen te mennen yo lakay SENYÈ la, nan chanm a fis a Hanan yo, fis a Jigdalia a, nonm Bondye ki te toupre chanm ofisye yo, ki te anwo chanm Maaséja a, fis a Schallum nan, gadyen pòt la. 5 Epi mwen te plase devan mesye lakay Rekabit yo, krich plen ak diven ak tas, epi mwen te di yo: “Bwè diven!”
6 Men yo te di: “Nou p ap bwè diven, paske Jonadab, fis a Récab la, papa nou, te bannou lòd e te di: ‘Nou p ap bwè diven, ni nou menm, ni fis nou yo jis pou tout tan. 7 Nou pa pou bati kay e nou pa pou simen semans, ni plante chan rezen, ni achte youn; men se nan tant nou dwe viv pandan tout jou nou yo, pou nou kapab viv anpil jou nan peyi kote nou demere a.’ 8 Nou te obeyi a vwa Jonadab, fis a Récab la, papa nou, nan tout sa li te kòmande nou, pou pa bwè diven pandan tout jou nou yo, nou menm, madanm nou, fis nou yo ak fi nou yo, 9 ni bati pou nou menm kay pou nou ta viv ladann. Nou pa genyen chan rezen yo, ni chan kiltive, ni semans, 10 “Men se sèlman nan tant nou te rete yo. Nou te obeyi e te fè selon tout sa ke Jonadab, papa nou, te kòmande nou yo. 11 Men lè Nebucadnetsar, wa Babylone nan, te monte kont peyi a, nou te di: ‘Vini! Annou ale Jérusalem akoz lakrent lame Kaldeyen yo ak lakrent lame Siryen yo. Konsa, nou va rete Jérusalem.’”
12 Epi pawòl SENYÈ a te vini a Jérémie. Li te di: 13 “Konsa pale SENYÈ a, Bondye Israël la: ‘Ale di a mesye Juda yo, e a sila k ap viv Jérusalem yo: “Èske nou p ap resevwa lenstriksyon pou koute pawòl Mwen yo?” deklare SENYÈ a. 14 “Pawòl a Jonadab, fis a Récab la, ke li te kòmande fis li yo pou pa bwè diven yo, byen obsève. Pou sa, yo pa bwè diven jis rive jou sa a, paske yo te obeyi lòd papa yo. Men Mwen te pale ak nou ankò e ankò, e nou pa t koute Mwen. 15 Anplis, Mwen te voye a nou menm tout sèvitè Mwen yo, pwofèt yo. Mwen te voye yo ankò e ankò e yo te di: ‘Vire koulye a chak moun kite move chemen li, korije zèv mechan nou yo, e pa kouri dèyè lòt dye yo pou adore yo. Konsa, nou va demere nan peyi ke M te ba a nou menm e a papa zansèt nou yo;’ men nou pa t enkline zòrèy nou, ni nou pa t koute Mwen. 16 Anverite, fis a Jonadab yo, fis a Récab la te swiv lòd a papa yo ak sila li te kòmande yo, men pèp sa a pa t koute Mwen.”’
17 “Akoz sa, pale SENYÈ a, Bondye dèzame yo, Bondye Israël la: ‘Gade byen, Mwen ap mennen sou Juda ak sou tout sila ki rete Jérusalem yo, tout dezas ke M te pwononse kont yo, akoz Mwen te pale ak yo, men yo pa t koute, e Mwen te rele yo, men yo pa t reponn.’”
18 Epi Jérémie te di a lakay Rekabit yo: “Konsa pale SENYÈ dèzame yo, Bondye Israël la: ‘Akoz nou te obeyi lòd a Jonadab, papa nou an, nou te swiv tout lòd li yo, e te fè tout sa ke li te kòmande nou;’ 19 Pou sa, konsa pale SENYÈ dèzame yo, Bondye Israël la: ‘Jonadab, fis a Récab la, p ap manke yon nonm ki pou toujou kanpe devan M.’”